Nongstoiñ, Lber 28: Na ka bynta ban pynkhlaiñ ïa ka rukom treikam jong ka party ha West Khasi Hills, ka Bharatya Janata Party Nongstoiñ Constituency ha u kyrwoh ba la phah mynta ka sngi da u bah D.D Sohphoh president barim jong ka party, la ong ba ha ka jingïalang dang shen ka party ka la pynthymmai ïa ki nongkitkam jong ka BJP West Khasi Hills, ha kaba la jied dei ïa u bah Demander Lyngdoh kum u president jong ka district, bah Jlington Kharjahrin Vice president, bah Innocent Wahlang secretary bad bah Didimus Sohphoh kum u ophis secretary bad khatwei ngut ki executive member.
Kum ban pynkynmaw ba u bah Demandar Lyngdoh u la mih madan ban ïa ai reng kum u MDC na ka 32 Nongstoiñ Constituency, hynrei um shym la poi ha ka jingjop kumta ka ka party ka la I donkam ban pynthymmai noh ïa ka rukom treikam hapoh ka constituency.
La ong ruh ba ha katei ka sngi baroh ki nongkitkam bad ki dkhot jong ka Executive Committee ki la ïa poi. Ha katei ka jingïalang ka party ka la rai ba kan sdang noh ban trei hapoh ka district baroh kawei na ka bynta ban pynkhreh ïa ka Election MLA ka ban sa long ha u snem 2028.
U bah Demandar haba ai jingkren hadien ba u la shah jied kum u president, u la ong ba kum u nongïalam ba thymmai un pyrshang katba kot la ka bor ban trei shitom bad ban ai ka jingshakri kaba paka ïa ki paitbah ka constituency.
Ban buddien ïa baroh ki kam pynroi kiba ka sorkar ka la mang na ka bynta ka constituency, la ka long ïa ki skhim shimet kum ka PMAY, u khaw ba ka sorkar ka la ai kyrpang na ka bynta ki longïing naduh ka por ba wan ka khlam corona bad ruh ïa ka skhim umbam um dih ka Jaal Jeevan Mission bad kiwei kiwei.
