Ïoh pdiang ka KHADC ïa ka pisa T. 12 klur tam ka pisa kaba la buh ha ka Untied Grant

Shillong, Lber 28: Ka Khasi Hills Autonomous District Council (KHADC) ka la ïoh pdiang ka pisa T. 12,15,00,000 na ka T. 24,30,00,000 kaba la buh hapoh ka Untied grant lyngba ka 15th Finance Commission na ka bynta ka snem mang tyngka 2021-2022.
Ïa kane la pyntip da u executive member ba khmih ïa ka tnat IT, Land & Development u Bah Powell Sohkhlet haba jubab ïa ka jingkylli ba la wanrah ha ka sngi Thohdieng ha ka dorbar mang tyngka.
“Ka pisa kaba dei ka Untied grant la pyllait ha ka 11 tarik u bnai Nohprah, 2024,” u la ong.
Hapoh ka Tied grand, u Bah Sohkhlet u la ong ba ka pisa T. 18,22,50,000 na ka T. 36,45,00,000 kaba la buh la dep ban pyllait ha ka 9 tarik u Nohprah, 2022.
Ha u snem 2020-2021, ka pisa kaba dei T. 40,95,00,000 la dep ban pyllait kaba hab hapoh ka Untied grant ha ki artylli ki instalment kaba ha ka 10 tarik u Nohprah, 2020 bad ha ka 10 tarik u Lber, 2022 bad kumjuh ruh ka pisa kaba T. 40,95,00,000 la dep ban pyllait hapoh ka Tied grant ha ki artylli ki installment kaba dei ha ka 9 tarik u bnai Naitung, 2021 bad ha ka 16 tarik u bnai Jymmang, 2022.