Ka KHADC kam don ïa ka Map hynrei ka don pat la u jong u Pud u sam, ong u Bah P Sohkhlet

Shillong, Lber 28: U EM ba khmih ïa ka tnat Land jong ka EC KHADC u Bah P Sohkhlet u la ong ba ka KHADC kam don satia ïa ka Map hynrei ka don pat ïa u pud u sam.
Ïa kane u la jubab ïa ka jingkylli ba la wanrah da u MDC u Bah S Rashir ha kaba ïadei bad ka jingdon jong ka map ka KHADC ha kaba ïadei bad ki jaka kiba dang hap ha khappud.Na ka liang u EM u la ong ba ha kaba ïadei bad kane ka bynta na ka liang ka EC kan sa shong bishar kam ban wad ki jingtip la ka KHADC ka don ne em ïa la ka jong ka Map.
Haba jubab bynrap ïa ka jingkylli ba la wanrah da u MDC ka Sohra u Bah T W Chyne halor kiei kita ki pud ki sam ka KHADC u Bah Powell u la ong ba ïa ki pud ki sam la shim na ki Hima bad ki Elaka bad baroh u pud u sam u hap hapoh ka jingpeit jong ki Hima.
Ha kaba ïadei bad kane haba pyntip ba ka EC barim ka la don ïa la ka jong ka Boundary Committee bad ba la aiti sha ka sorkar jylla ka EC ka dei ban buddien ïa kane namar lada ym biang u pud u sam ki bun ki ban shim kabu kumta dei ban don la u jong u Boundary Piller khnang ba kan long ka jingshngaiñ ïa u pud u sam jong ka KHADC.