La pynskhem ïa ki nongkitkam ba thymmai jong ka FKJGP-EJHD

Khliehriat Naiwieng 17: Ki nongïalam jong ka Federation of Khasi Jaiñtia and Garo People Central Body ba kynthup u President u bah Dundee Cliff Khongsit, vVice President, u bah Kitboklang Nongphlang, President FKJGP na West Jaiñtia Hills u bah Damian war bad kiwei kiwei kiba dei ki nongïalam ka seng, mynta ka sngi ki hiar sha Khliehriat bad utei u nongïalam ba rangbah na Central body u la pynskhem ïa ki nongkitkam ba thymmai jong ka FKJGP East Jaiñtia Hills District ki ban trei na ka bynta une u snem 2023 haduh 2026.
Baroh kiba kren ha ka jingïalang, ki la ai ka jingkhublei kitbok kitrwiang ïa ki nongkitkam ba thymmai jong ka FKJGP East Jaiñtia Hills Distrct ba kin nang iaid shaphrang ban trei na ka bynta ka bha ka miat jong ka ri bad ka jaitbynriew.
U bah Dundee Cliff Khongsit, u la kyntu ïa ki nongkitkam ba dki dkhot ka seng bad ki dei ban ri ia ka burom ka akor “Lada ngi kren shaphang ka jingieid ri, ieid jaitbynriew hynrei lada ngim ieid ïalade, ngim burom ialade, ngim burom ïa ki para nongïalam sengbhalang ka long lehnohei” u la kyntu ruh ïa ki nongkitkam ba dki dkhot ka FKJGP East Jaiñtia Hills District ba ki dei ban long kiba iatylli, kiba kloi ban mih shakhmat ban kyrshan lang ïa ki mat jong ka seng kiba long ka daw bah jong ka ri bad jaitbynriew, ym dei ban shu iehnoh tang ha ki nongialam namar ki dkhot ki dei ka metbah jong ka seng.
U la ong ba ka seng ka trei ruh ban kyntiew ïa ka roi ka kiew ha ka jylla hi baroh kawei ban pynioh ïa ka hok jong ki paidbah, u la ong ba ka sorkar kaba la leit bad kane ka sorkar ba mynta ka ai district khlem da wanrah ïa ka roi ka par bad ha ka jinglap jong ka seng dang don bun ki jingduna ha ki district.
Ha kajuh ka por u bah Kongsit u la ai mynsiem ïa baroh ki khun samla ba ki dei ban don ka mynsiem ialeh ha ka jingpule jong ki ruh ban pynleit jingmut ha ki kam kiba kham shalor ba kin iakhun ïa ki exam UPSC bad kiwei kiwei ki jait exam, ha kaba na la liang ka seng ruh ka kular ban iai don ryngkat lang bad ki ha ki jingpule jong ki ha ki kyrdan kiba kham sha jrong.
Haba ken sha ki dkhot bad ki nongialam jong ka FKJGP East Jaiñtia Hills District, u la ong ruh ba ka jingrung sha ka seng kam dei satia ban ioh ka jingim ba kylluid, hynrrei kan don bun ki jingeh, ka along, ka îingbyndi bad ka Police Station ki la ap lypa namar ha kano kano ka por lah ban sha kem “Ban pyntieng pynsmiej ïa ngi kum ki dkhot jong ka seng ka sorkar ka don tang kawei ka buit kata ka long ban thep along, thep ha iingbyndi, na kata ka daw ka jingrung sha ka seng kam dei ka kam kaba suk hynrei ka dei ka lynti kaba eh bha” u la ong ba hapdeng kiei kiei kiba kum kine u la ai mynsiem ïa ki dkhot bad nongïalam ba ki dei ban don ka mynsiem ba shynrang.
U Vice President, u bah Kitboklang Nongphlang u kyntu ban long kiba ïatylli da ka mynsiem jingia ieid iwei ïa iwei ban trei ruh da ka mynsiem ba shynrang da ka dohnud ba shemphang “kum ki nongïalam ngi dei ban long beit kiba la khreh ha kano kano ka por, ki mat (issue) kiba bun, ki jingialeh kiba bun, ha ka jingiaid lynti kum ka seng ngi mad bun ki jingeh, ki ïingbyndi kim lah satia ban long ki diengpyngkiang ban kah lynti ban shakri ïa ka ri bad jaitbynriew.” u la bynrap bad pynpaw ka jingsngew khia ruh halor ka jingwan rung kyrthep ki mynder bad ong ba kane shisha ka la pynsuh jer ïa ngi baroh kawei bad la sdang ban leh trai khlieh da ki nongwei
“ Ka thma ba jar jar jong ki mynder mynta ka dei ka jingkynrei u drok, kaba phylla ka long ba bunsiem kiba shah kem ki dei ki khyllah jait bad ki bar jylla kane ka dei ka jinsghah hiar thma kaba jar jar ïa ngi kum ka ri bad ka jaitbynriew, ki nongwei ki la sdang da kine ki buit poh kiba thymmai ban pyngngop ïa ki khun samla ha u drok bad haba ki la ngop kin sa kylla long ki mraw jong ki mynder bad kylla long mraw ha kiba bun ki bynta”
U General Secretary Khasi Students Union East Jaiñtia Hills District, u samla rangbah, u bah K.S. Suchiang, u la pynpaw ka jingsngew khia halor ka jingthmu ka sorkar ban wanrah lynti rel ha East Jaiñtia Hills District bad ong ba kum ka seng hi kan ieng pyrshah beit ïa kane bad kynthoh jur ba kane ka dei ruh ka jingthmu jong ki heh saipan “watla ngin kyllon ha ka thma bad ha ka jingialeh kam pher tangba ngin pyrshah beit ïa kane ka lynti rel”
Kumjuh ruh haba kren sha ki nongïalam bad ki dkhot ka FKJGP u la ong ba ka KSU ka kloi ban ai ka jingiatreilang ha kano kano ka por.
Utei u nongialam ka KSU na East Jaiñtia Hills District, u la pynpaw ka jingsngew khia halor ka jingkynrei u drok bad u ruh u la ong ba kane ka jingwan ki drok ka dei ka jinghiar thma ba jar jar ïa ka ri bad ka jaitbynriew la ong ruh ba kum ka seng (KSU) ka kloi ruh ban ai ka jingiatreilang bad ki bor ka aiñ ban rat dyngkhong bad pynduh jait ïa u drok.
Kiwei kiwei kiba la ai jingkren ki kynthup u President FKJGP East Jaiñtia Hills District, u bah Deihok Smer, Vice President u bah Welking Swer, u bah Tuesday Lytep bad kiwei kiwei, ia ka jingialang la pyniaid da u President FKJGP West Jaiñtia Hills, u samla Damian War.
Ki nongkitkam jong ka FKJGP East Jaintia Hills District kiba la pynskhem ki kynthup, u President, u bah Deihok Sumer, Vice President, u bah Welking Swer, General Secretary, Emlang Sutnga, Assistant Secretary, bah Hamkhia Siangshai, Organising Secretary, bah Andiwor Pala,Assistant Organising, bah Johnlang Bamon, Information Secretary, bah Micheal Chyrmang Chief Adviser, bah Alprin Dkhar, Legal Adviser, bah Cyprian Dkhar (Advocate), Education Secretary, bah Prosperity Rymbai, Agriculture Secretary, bah Fullmoon Nongtdu bad kiwei kiwei.
Ïa kitei ki nongkitkam la pynskhem da u President rangbah ka FKJGP Central Body, u bah Dundee Cliff Khongsit.
Kiba la ïa don lang ha kane ka jingialang ki kynthup ruh ki nongïalam jong ka Jaiñtia Students Movement, ka HNYF East Jaiñtia Hills District, Khasi Students Union East Jaiñtia Hills District bad kiwei kiwei ki kynhun seng bhalang.