Nongstoiñ, Naiwieng 17: U Deputy Commissioner (Supply) West Khasi, Hills District, Bah, Garod L.S.N Dykes IAS, u la pyntip sha baroh ki nongshong shnong kiba hap hapoh jong ka West Khasi Hills District Nongstoiñ, ba ka Sorkar India lyngba ka Ministry of Petroleum bad Natural Gas, ka la pyllait ïa ka Free LPG Connection sha baroh ki longïing ha ka kyrteng jong ki longkmie kiba hap hapoh ka thup jong ka BPL, lyngba ka skhim Pradhan Mantri Ujjwala Yojana (PMUY) 3.0 Scheme kaba la pyntreikam ha baroh kawei ka ri India.
Kumta, la kyntu ïa baroh ki longkmie kiba hap hapoh ka thup BPL bad kiba dei hok ban ïoh jingmyntoi lyngba kane skhim, ba kin leit ban aplai ïa kane ka Free LPG Connection na ka M/s Ailang Gas Agency Nongstoiñ.
Ki kot jingdonkam ki long Xerox Ration Card (AAY/PHH/Non-NFSA) lane Job Card lane Family Composition form. Nangta Xerox Aadhaar Card, Xerox Bank Passbook, dur passport 2 tylli, Phone Number, Xerox Aadhaar Card lane Job card jong I nongïoh bynta, kiba la kot 18 snem sahneng. Ïa ki jingtip kiba kham bniah, lah ban ïoh da kaba phone ha u 9856627368.
