La pynlong ïa ka District Level Campaign on Gender Based Violence ha Khliehriat West
Khliehriat, Nohprah, 01: Halor ka jingthmu bad ka thong ban pynsaphriang ïa ki jingpynshai paidbah kaba ïadei bad ka jingshah thombor ha ka longbriew manbriew kynthei lane shynrang, ka Meghalaya State Rural Development Society (MSRLS), East Jaiñtia Hills District, ha ka 29 tarik u bnai ba ladep ka la pynlong ïa ka jingpynshai paidbah ha Khlienriat West Community Hall
Haba kren ha ka jingïalang, u Assistant Commissioner jong ka East Jaiñtia Hills District, u S. Malviya u la ban jur halor ki jingmih na ka jingshah thombor ne shah ban beiñ kaba ju jia ha ki longïing longsem kumjuh ruh ka jingshah thombor ne shah ban beiñ ïa ki kynthei ki khynnah ha ka imlang ka sahlang.
U Project Director jong ka DRDA, East Jaiñtia Hills District, u Bah G. Warjri, u la ai ka jingïaroh namar ka jingwan ki nongkitkam bad ki dkhot jong ki Self Help Group (SHG) bapher bapher ha kane ka prokram ha Khliehriat bad u la kyntu bad pynshlur ïa ki ba kin mih shakhmat ban shim ïa ki sienjam ban pynsaphriang ïa ka khubor sha ka imlang ka sahlang halor kane ka jingpynshai paidbah bad u la kren ruh halor ka jingdonkam ban ïadon kti lang ki shynrang ne ki rangbah ruh ha kane ka CLF-Level Gender Campaign ba kane ka jingïalap paidbah kaba ïadei bad ka imlang ka sahlang kan long kaba sei soh shuh shuh.
Ha kane ka prokram la ïa don lang ruh ki Muktiar kiba la mihkhmat na ka District Legal Services Authority (DSLA), East Jaiñtia Hills District, ki heh Sorkar na ka One Stop Centre (OST) bad na ka tnat Pulit kiba la ai ïa ki jingkren bad jingpynshai sha ki paidbah halor ki lad jingïarap na ka bynta ki kynthei bad ki khynnah kiba ngat ha ka apot jong ka jingshah thombor bad shah ban beiñ.
Ki nongkren ki la pynshai ruh ïa ki lad jingïada kiba katkum ka aiñ na ka bynta kito ki kynthei kiba ngat ha ka jingshah thombor bad kiwei kiwei ki aiñ ban ïada ïa ki kynthei ki khynnah.
Ha ka prokram la ïa don ryngkat lang ruh u Block Development Officer jong ka Wapung C&RD Block u Dr. T. Shylla, u Block Development Officer jong ka Saipung C&RD Block u Dr. R. Pyrtuh,ki heh ophisar kiba na ki tnat bapher bapher, ki nongïalam jong ki Cluster Level Federation (CLF), ki dkhot jong ki Voluntary Organization (VO) bad ki dkhot jong ki Self Help Group (SHG).