“Ban ym pep ban duwai’ ki tien im sngi jong ki kynthei Katholik ha ka dorbar baphra

Shillong, Nohprah, 01: – “Wat ju pep ban duwai” kaba la sot na ka Shithi Ba Nyngkong u Paulus Apostol Bakhuid 1 Thessalonika 5:17 ka dei ka mat puson jong ka Dorbar Bah ba phra ka Synjuk ki Kynthei Katholik Shillong Archdiocese ïa kaba la pynlong ha Upper Shillong Parish ha ka Lah Sngi U Blei.
Ha kane ka dorbarbah jong ki kynthei bad ki longkmie ka Jylla Niam Bah Shillong la sakhi lang da Archbishop jong ka Jylla Niam Bah Shilong u Most. Rev. Victor Lyngdoh uba la long kum u kongsan ban pynmynta ïa ka nguh ka dem Blei ha ka Mass Bakhuid.
Ha ka mat ïatai jong ka dorbar pyllun ki kynthei jong ka Synjuk ki Seng Kynthei Katholik ki la shim ïa ka bynta jong ki iing ki sem ban im ha ka jingduwai, la ïathuh u Archbishop Victor Lyngdoh.
Haba pashat ïa ka pasoh jingduwai ki longkmie ha ka lympung u Archbishop Victor u ai tang lai tylli ki mat, kata, ka longkmie ban seng, ban duwai ïa ka iing ka sem ba ka longkmie kaba kit ïa ka eh ka shon bad kaba pynroi ïa ka pyrthei da ki khun shynrang bad kynthei.
U ong ba ka longkmie ka dei “ka Ka Dohnud ïa ka iing, ka Balang, ka imlang ka sahlang bad ka jingim mynsiem.”
Ka jingdon ka kynthei kaba janai da ka jingieid ban don ka jingpynkylla ïa ka pyrthei da ka jingim kaba thymmai bad kaba skhem, la bynrap u Most Rev. Victor Lyngdoh.
Kum u nongsharai mynsiem ba hakhliehduh jong ka Jylla Niam Bah Shilllong u Most Rev. Victor Lyngdoh u da pynpaw ka jingsngewnguh ïa ki longkmie jong ka Jylla Niam Bah ba ki pyndap pynshngaiñ ïa ka Balang.
Ïa kane ka Dorbarbah jong ki longkmie la synran lang da u Spiritual Director ka Synjuk u Fr. Alfred L.Nongbri, ka President jong Synjuk ka Kong Kiltiiora Marbaniang bad ka Secretary ka Kong Joplin Nongdhar ha kaba ki la lah ban lum ïa ki longkmie da ki phew hajar ngut na ki hynñiew tylli ki Zone kiba hap hapoh ka East Khasi bad Ribhoi District.
Ha jinglehniam ha ka por mynstep, la synran ïa u Archbishop Victor Lyngdoh da u Fr. Tobias Kharngapkynta uba long u Parish Priest jong ka Upper Shillong Parish, u Fr. Leo Mary Lyndemu, u Fr. Sylbanus Nongkynrih bad kiwei pat ki Lyngdoh Sohblei.
Na kane ka dorbar ka Synjuk ka la shim ïa ka rai bad mynjur ïa ka jingïamir jingmut ha ki ar sngi da ki kyntien jingduwai “Ban ym pep ban duwai.”
La pynwai ïa ka lympung da ka jingpynhiar ïa ka lama da u Most. Rev. Victor Lyngdoh bad u Spiritual Director u Fr. Alfred L Nongbri bad ka jingpynbna ïa ka Dorbar Pyllun kaba ban sa long ha u snem ban wan kan leit sha ka Zone II ïa kaba yn pynlong ha Iingmane Bah Cathedral Parish, Laitumkhrah, Shillong.