Plie kamra Klass bad pynhap pyrda u MLA Mawkynrew ïa ka taiew lehkmen ki khynnah skul Nongjrong PLP

Shillong, Nohprah 1 : Kum u Nongmihkhmat uba thrang ban kyntiew ïa ka pule ka puthi hapoh ka Mawkynrew Constituency, u MLA kane ka Constientuency u bah Banteidor Lyngdoh u la phai khmat sha ki skul ban ïarap ïa ki na ka MLA skhim jongu khamtam ïa ki jingdonkam ba kyrkieh. Kumta haba ki bor pynïaid jongka skul Nongjrong Presbyterian LP School (NPLPS) ki la wan pan jingïarap na ka bynta ban pynkha kamra Klass ba la bun ki khynnah skul bad ka la buh ka jingeh ban kin ïoh jaka shong, mar mar khlem kyrngah u la mang na ka MLA skim na ka bynta katei ka kam ha u snem 2023-24 bad mynta ïa katei ka kamra Klass la dep shna bad plie ruh ha ka 29 tarik Naiwieng 2024 da u MLA hi.
Ka jingmang pisa ban pynkha ïa katei ka kamra Klass ka long 3 lak tyngka bad la mang ruh 4 lak tyngka ban tei ïa ka kynroh jongkatei ka skul bad mynta katei ka skul ka la ïoh ïa ka kynroh skul bad katei ka kamra Klass.
Ha katei kajuh ka sngi ym tang ba u wan ban plie ïa katei ka kamra Klass hynrei u la wan ruh ban ïadon ryngkat bad ki Khynnah Skul, ki Nonghikai katei ka skul ha ka jingpynkut jongki ïa ka jingrakhe ïa ka taiew lehkmen ki khynnah skul. U bah Banteidor u la ïoh ruh ban sam ïa ki prize sha ki nongïashim bynta kiba jop ha ki jingïalehkai bapher bapher ha katei ka jingrakhe ïa ka taiew lehkmen jong ki khynnah skul.
Shwa ba un ai ïa ka jingkren kum u kongsan la ai jingkren shwa da u Head Master, na ka liang ka Skul Managing Committee bad kiwei kiwei. Na ka liang ki bor pynïaid ka skul ki la ai khublei kyrpang ïa u MLA uba la kloi ban ai ka jingïarap ban tei ïa katei ka kamra Klass bad kumjuh ruh ïa ka kynroh jongka skul. Haba kren ha ka jingïalang u bah Banteidor u la ai ka jingïaroh ïa katei ka skul kaba la kiew bha kaba la don mynta 183 ngut ki khynnah skul. U la ong “ Hooid kiwei kiwei ki skul ha ka shnong Nongjrong ruh ki la kiew bha hynrei itynnad ba ka Nongjrong Presbyterian LP Skul ka dei kawei na ki skul kaba la sei ïa kiba bun ki khynnah skul kiba la long mynta kum ki nongkyntiew bad pynïaid ïa ki kam jngohkai khamtam ba ka Nongjrong ka dei kawei na ki jaka jngohkai kaba khring bha ïa ki nongwan jngohkai na kylleng ki jaka bad na shabar ri ruh. U la ban jur ïa ki khynnah skul ba kin nang ïai minot bad trei shitom ba kin dang pass bad kiew klass man la u snem khnang ba kin long ki khlur ba tyngshaiñ ha ka shnong ka thaw. U la ong “ Ka jingïatrei lang jong ki bor pynïaid jongka skul, ki kmie ki kpa bad ki nongshong shnong ka long kaba donkam bha ban kyntiew ïa ka pule puthi bad pynphuh pynphieng ïa ka skul ruh. Na ka liang jong nga ngan dang ïai theh shuh shuh ki jingïarap sha ki skul na ka MLA skhim jong nga namar nga kwah ba ka thaiñ kan kiew bha ha ka liang ka pule puthi bad kane ka dei ruh kawei na ki jingthrang jong nga kum u Nongmihkhmat jongphi. Na kata ka daw nga pyrshang katba lah ban ïarap ïa man la ki skul ha ki shnong ki thaw bapher bapher. Nga kyntu ïa baroh ki bor pynïaid jong ki skul ba kin pyndonkam hok ïa ka jingïarap khnang ban long kaba itynnad bad ïaid beit ïaid ryntih bad kan pynsuk shuh shuh ïa nga ruh ba nga nang theh ki jingïarap sha phi”.
Ha kane ka sngi la wan ruh ban synran bad ïadon ryngkat bad ki Khynnah skul da ki Tymmen Basan bad ki Rangbah Balang.