La pynkut ïa ka North East Graduate Congress ba 3 sngi ha USTM, ioh jingmyntoi bun ki samla pule

0

Nongpoh, Ïaiong 10 : Ka jinglah ban pynlong ïa ka 7th North East Graduate Congress, kawei na ka lympung ïa kynduhlang jong ki samla pule na ka thain Shatei Lam Mihngi ka Ri India ha University of Science & Technology, Khanapara ka la ai jingmyntoi shibun ïa ki khun samla bad ha kane ka lympung ki la poi haduh 10 hajar ngut ki samla na ki College bad ki University bapher bapher kiba don hapoh ka thaiñ shatei Lam Mihngi ka ri India.
Kane ka North East Graduate Congress ka la sdang naduh ka 8 tarik u Ïaiong 2023 ha University of Science & Technology, Khanapara bad ïa kane ka lympung la lah ban pynkut noh mynta ka sngi ha kaba bun ki khun samla ki la pynpaw ïa ka jinghun mynsiem ban ioh ban ïa shim bynta ha kum kane ka lympung kaba kham ïar ban ioh ban ïa shim bynta ban ïa tai halor ka pule ka puthi bad ka jingnang jingstad bad kumjuh ruh kiwei ki kam kiba kyntiew ïa ki jylla bad ka ri India hi baroh kawei.
Ha ki jingïakop bapher bapher lyngba kane ka North East Graduate Congress, ka College kaba wan ha ka kyrdan ba nyngkong ka leit sha ka Sibsagar College, katba ka Kampur College ka la jop ha ka bynta jong ka Best Magazine prize.
Ka long ruh ka jingioh mynsiem ïa ki samla pule ka jylla Meghalaya, ha kaba ha kane ka jingïakop ban ïatai ha ki bynta bapher bapher lane ba la tip kum ka Best Debater award la rah da ka Samla Saphira Magdaline Lyngdoh na St Anthony’s College, Shillong, bad ka Maiong Ancholik College ka la jop ha ka thup kaba dei shaphang ka jingpyni nam halor ka jinglong tynrai (Cultural Procession)
Ha kane ka lympung ki la don ruh haduh 46 tylli ki jaid jingïakop bapher bapher naduh ki kam sport, ka kolshor, ka thoh ka pule bad ha ka liang ki kam ki jam la pynlong ha kane ka lympung bad la don ruh ki khusnam kyrpang haduh Rs. 50 lak bad kynthup ruh naduh ki Kali ar shaka, ki Laptop, ki Tablet, Mobile Phone bad ki khusnam pisa ba la aiti sha ki nongjop ha ki bynta bapher bapher.
Haba kren ha kane ka sngi ban ai mynsiem ïa ki samla pule bad ki nonghikai bapher bapher, u Mahbubul Hoque, Chancellor ka USTM, u la ong ba ka jingthmu ba la wan rah ïa kane ka North East Graduate Congress ka long ban plie lad plie lynti ïa ki samla pule na ki jylla ka thaiñ Shatei Lam Mihngi ka Ri India na bynta ba kin lah ban thaw lad thaw lynti kumno ban tei ïa ka ri bad ka jaid bynriew.
U la ong ruh ba kane ka NEPC ka dei kawei na ka lympung ba ju pynlong da ka USTM kaba don ka jingangnud ban pynshlur ïa ki samla pule ba kin don ïa ka jingshlur ban shim bynta ha kino kino ki jaid jingïakop kiba lah ban tei ïa ka jingim jong ki shimet bad kumjuh ruh ban tei na ka bynta ka bha ka miat jong ka imlang ka sahlang bad ka ri bad ka jaid bynriew hi baroh kawei.
“Kane ka lympung ka wan rah ruh ïa ka jingïadei kaba jan hapdeng ki khun samla jong ki jylla shatei lam mihngi ka ri India bad kum ki khun samla kin don ruh kata ka jingkitkhlieh ban tei ïa ka ri bad ka jaid byrriew” ong u Hogue kum u Chancellor ka USTM.

Leave A Reply

Your email address will not be published.