Hadien ka jingjop ha ka MLA Election, pynkup burom ka UDP Nongjri ïa u Bah Pius Marweiñ

Mawkyrwat, Ïaïong 10: Mynta ka sngi ka 10 tarik u Ïaïong, 2013 ka United Democratic Party (UDP) jong ka Nongjri Zonal Committee kaba hapoh jong ka Ranikor Constituency ha ryngkat kiba ha ïing ha seng lem bad ki paidbah nongkyrshan ki la ïoh ban pynlong ka jingïalang paidbah ha madan jong ka Shnong Nonghyllam, South West Khasi Hills District ban pynkup burom ïa u bah Pius Marweiñ halor ka jingjop biang jong u kum u MLA ka Ranikor Constituency bad halor ka jingïoh jong u ïa ka shuki EM ka Elika jong ki lai tylli ki distrik, ka Sports & Youth Affair bad Building by Law hapoh ka KHADC.
Haba kren kum u nongshah pynkup burom, u bah Pius Marweiñ uba dei u MLA ka Ranikor Constituency u la pynpaw nyngkong ïa ki kyntien ai khublei kaba kyrpang ïa baroh ki paidbah kina dei ki nongkyrshan bad ki nongkitkam jong ka party UDP napoh ka Ranikor Constituency ba ki la pynjop don burom ïa u sa ha kane ka Election MLA 2023.
Ha kajuh ka por u la ong ruh ba kine kiei kiei ki wan jia ha ka jingim ka dei lyngba ka jingbtin bad ki jingkyrkhu U Blei U ba na jrong. U bah Pius Marweiñ haba bynrap shuh shuh ïa ki jingkren u la ïoh ruh ban ïathuh lyngkot ïa ka jingim lade naduh ba u dang rit ka karta da kaba ong, “ha ka jingim jong nga lada nga thmu ïa kano kano ka kam na ka bynta ka jingim lyngba ki kam, um ju leh noh ei hynrei u poi beit ha kata ka ïa kaba u la thong”
Namarkata, u pynpaw ka jingngewnguh ïa U Blei Nongbuh Nongthaw ba U la kyrkhu ïa u haduh katne ba u la long mynta bad kumjuh ruh u la ai khublei ïa ki paidbah kiba la shim biang ïa kane ka rai ba pynjop biang sa ha kane ka kynti ba mynta naduh ka by-elections jong u snem 2018 bad kumjuh ruh ha une u snem 2023.
Ha ka jingkren jong u President, ka UDP Ranikor Circle, u bah G.G. Bung Snaitang bad na u Working President ka UDP Ranikor Circle, u bah C. Nongbri ki la ong ba ka Ranikor Constituency ka long ka constituency kaba stad ha kaba ha kine ki 50 snem ba la dep ki la jied ïa ki nongmihkhmat kiba stad ban ïoh ïa ai bynta lem na kiwei pat ki jaitbynriew namar ba ka Ranikor Constituency ka dei kawei ka konstitwensi kaba don khleh ki jaitbynriew ba kynthup ïa ki jaidbynriew Hajong, Garo, Begali, Khasi bad kiwei kiwei de, hynrei ki halor kine ma ki kim shem la don kano kano ka jingïasngew jaidbynriew hynrei ki ïa im-suk im-saiñ ha ryngkat ka mynsiem jong ka jingïatylli baroh ki liang.
Ha kajuh ka por ma ki ruh ki la pynpaw ka jingsngewnguh bad ai khublei ïa u bah Pius Marweiñ u MLA ka Ranikor Constituency namar ba u long u briew u ba stad bad u long u ba lah ban pynïatylli ïa baroh ki jaid bynriew kiba don ha kane ka konstitwensi.
Ha kane ka sngi kiba la ïoh ban pynkup burom ïa u bah Pius Marweiñ ki don baroh 20 tylli ei ei ki kynhun kiba dei napoh jong ka Ranikor Constituency ha kaba ki la ai ha u da ki jaiñ ryndia ryngkat ki dur sah kynmaw ne momentous.
Kiwei pat ki nongkren ha kane ki long u Rakesh D. Shira, President UDP Zonal Khonjoy bad la ïoh ruh ka jingrwai pdiang sngewbha na ka Seng Longkmie jong ka Shnong Nonghyllam, bud sa ka Khasi Dance, Garo Dance, Bengali Traditional Dance, ka Hajong Dance, bad kiwei de ki program kyrpang.