La pynkut ïa ka L.P Inter School Sports ha Nongstoiñ

0

Nongstoiñ, Lber 31: Ha ryngkat ka phuh ka phieng, ïa ka Nongstoiñ Town L.P. Schools Sports Meet Organization West Khasi Hills District, ba la pynïaid da ka Nongstoiñ Town L.P. Schools Sports Meet Organization, la pynkut noh ha ka sngi palei, ha kaba ka St Francis D’Assisi School Siejlieh ka la rah ïa ka nam kum ka lahduh ne overall champion.
Lah ban kdew hangne ba kane ka lympung ba shisien shisnem jong ki heprit na ki Lower Primary School bapher bapher ka sor Nongstoiñ, la hap ban pynsangeh na ka daw ka jingpang Covid-19. Hynrei mynta u snem la lah ban pynim biang, ha kaba la pynlong biang sa shisien ïa kane ka Sports Meet kaba ar sngi ha madan New Nongstoiñ.
Lah ban kdew hangne ba la plie ïa kane ka lympung ha ka 29 tarik ha kaba u MLA Rambrai Bah R.G Momin u la long u kongsan. Katba ki skul baroh kiba la shim bynta ki long kumba 15 tylli ei ei na kylleng ka sor Nongstoiñ.
Ha ka 30 tarik kaba dei ka sngi pynkut la donlang da u Bah V.Swer ADC kumjuh ruh I DSO kong B.Syiem bad kiwei kiwei de ki kynrem ki lyndan ba kynthup ïa u President ka Nongstoiñ Town L.P. Schools Sports Meet Organization Bah K.K.Lynser bad kiwei kiwei de kiba la shim ruh ïa ka bynta ban sam ïa ki khusnam sha ki nongjop bapher bapher.
Ha katei ka jingïalehkai sport ba kynthup ïa ki kyrdan Junior bad Sub Junior, la wan sakhi ïa ka mynsiem ïalehkai ba shisha jong ki khynnah kaba la pynkmen shikatdei eh ym tang ïa ki khynnah hynrei wat ïa ki nongpynïaid ruh, ban ïohi ïa ka mynsiem kaba kmen jong ki khynnah nalor ba ki hap ban pynleit jingmut ha ki lynnong kot jong ki. Ki jingïalehkai nalor katto katne ki jingïalehkai tynrai, la kynthup ruh ïa ka high jump, long jump, race, march pass, ka march drill bad kiwei kiwei.
Ha kaba kut jong ka lympung bad haba kheiñ lang mano ba khamtam ïa baroh, ka skul St.francis D’Assisi School Siejlieh ka la long ka lahduh ha baroh ki jait jingïalehkai da kaba khur haduh 112 poiñt. Ha ka kyrdan kaba ar la ïoh ban khur da ka Dapboklang Giri Memorial Secondary School Porla kaba la khur haduh 66 point. Ha ka kyrdan kaba lai la ïoh bat da ka Mawkhlam Nongpyndeng Standard School kaba la ïoh 58 point.
Haba phai pat bad ka best March Drill ka Anderson Higher Secondary School ka la ïoh ïa ka nam lahduh katba ha ka best March pass pat la ïoh ban rah da ka Mawkhlam Nongpyndeng Standard School.
Na ka liang u Babu K.K Lynser President rangbah ka Synjuk, u la ong ba kum kine ki lympung dei ban ïai pynlong na ka por sha ka por, ban ai mynsiem ïa ki heprit ha ki kam ïalehkai. Hynrei, ka donkam ruh ïa ka sorkar ban phai khmat bha ha kane ka bynta ban ai mynsiem bad pynshlur ba ki heprit kin nang ban pynmlien, pyntbit bad ban pynkiew ruh ïa ki ha ki kam ïalehkai.

Leave A Reply

Your email address will not be published.