Jowai, Lber 15: Hashwa ban poi ka Shad Ñiam Behdieñkhlam hapoh ka Raij Jowai, ki nongïalam ñiam ka Raij ki la sdang ban bun kam, ha kaba pyndep ïa ki ñiam ki rukom ha ki bynta bapher bapher naduh ka kñia ai nguh ai dem kaba shisien shisnem.
Ïa kane ka lehñiam ba nyngkong la leh ha ka Sngi Saitjaiñ da kaba pyndep ïa ka Kbai Mooknor ha Ïawmusiang kaba ki khot ka Ïaw ka Syiem.
Ha kane ka Lehñiam Kbai Mooknor la ïalam khmat da u Dolloi kum u khlieh ka ñiam bad u khlieh ka Elaka ha ryngkat u Pator, u Langdoh, ki Sangot, ki Wasan, ki Phrakur Phrakmai bad ki Waheh Wasian ka Raij kila mih shakhmat ha Ïaw ka Syiem ban ai jingtip hapdeng kiba wan ïew wan hat bad ki nongshong die ba la sdang ka lehñiam ne ka Kñia ai nguh ai dem da ki hukum Blai.
Ha kine ki sngi ban wan hashwa ka Behdieñkhlam yn pyndep shuh shuh ïa ki lehñiam bapher bapher naduh ka Thoh Langdoh, ka Shad Shukra ka Soodwar Sooluti bad ïa ka Tawiar Takan ha u bnai Jylliew kiba long ki ‘Blai Chnong Blai Raij’ ïa kiba la pynshong pynthiah naduh basdang Ka Raij Ka Chnong ha ryngkat ki hukum jong ki adong ñiam.
