Jowai, Risaw 23: Ïa ka prokram prokram ai jinghikai suhjaiñ bad shna syntiew naka bynta ki nongshongshnong kiba don jingduna haki dkhot met (Persons With Disabilities) ha Kyndontuber, ïa kaba la pynlong daka Seng Kynjoh Shaphrang Ki Kynthei Kyndongtuber West Jaiñtia Hills District ha Vocational Training Center ïa kaba la bei pisa da ka Meghalaya State Skill Development Society (MSSDS) Shillong la plie pyrda ha kane ka 21 tarik Risaw 2022.
Ïa kane ka Program la wan plie da u BDO ka Laskeiñ Block Bah Bari Niang kum u kongsan ha ryngkat ka jingïadonlang ki dkhot Shnong, ki dkhot ka Seng bad ki nongshah hikai kane ka Training kiba na Kyndongtuber, Pammanik bad Mynso.
Ïa ka jingïalang ba lyngkot la pynïaid da U Rangbah Shnong Kyndongtuber ma Shiwa Siangshai. Kiba la ai jingkren ki long i kong Selmim Lyngdoh Secretary ka Seng, bah Lambormi Suchen Skill Development Officer ka MSSDS, ma Rilinius War Secretary VEC bad ma Dasumar Shylla Secretary Shnong. U BDO Laskeiñ Block haba ai jingkren shwa ban khap ïa u ribon, u la pynpaw ka jingkmen ïa ka MSSDS bad ka Seng Kynthei kiba la pynlong ïa kum kane ka Training ba kyrpang bad kaba nyngkong eh ha ka Block bad ka District nakabynta ki nongshongshnong kiba don jingduna ha ki dkhot met.
U la kyntu ïa baroh 30 ngut ki nongwan shah hikai ba kin long kiba minot bad ïaineh, u la khmih lynti ba hadien kane ka Training, kine baroh kin lah ban kyrshan bad seng kam la jong katkum ka jingtbit ba ki la ioh haka kam suhjaiñ, shna tiar kti bad syntiew rkhiang.
Ka MSSDS ka la wanrah shibun ka jingmyntoi iaki samla bad longkmie hakane ka juk kyrduh kam lyngba ki jingai jinghikai pyntbit ha kiba bun ki jait kam khnang ba kin lah ban ïeng hala ki jong ki kjat bad seng iaki kam ki jam ban ïoh kamai jakpoh.
Naka liang u Rangbah Shnong ula pynpaw ka jingsngewnguh kyrpang ïa ka MSSDS bad ka Seng Kynjoh Shaphrang kiba la lah ban ai ka jingmyntoi ïaki nongshongshnong lyngba kane ka ‘Skill Training’.
