Ryngkat ki symboh pyrkhat kum ki Longkpa, leit phai ïing ki Longkpa Katholik, Zone-VI na ka Lympung ha Nongkhrah

Nongpoh, Risaw 23: Da ki hajar ngut ki Longkpa ka Balang Katholik ba hap ha ka Zone-VII jong ka Shillong Archdiocese mynta ka sngi ki la leit phai noh sha la ïing la sem ban rah lang ruh ryngkat ki symboh pyrkhat kum kita ki Longkpa ban don ka jingkitkhlieh na ka bynta ka ïing ka sem, kaba dei hadien ba ka lympung ba hynñiew kaba la long ar sngi ha Nongkhrah ka la kut noh mynta ka sngi u Blei.
Kum ban pynpaw, kane ka dei ka lympung ba ju ïa kynduh lang ki Longkpa Katholik na ka Zone-VI jong ka Shillong Archdiocese kaba la dei ha ka wat kaba hynñiew bad ka jingthmu jong kane ka lympung ka long ban lum lang ïa baroh ki Longkpa Katholik ban ai ka jinghikai bad ruh ban ïa tai ïa thir halor ka kamram jong u kpa la ka long ha ïing ha sem, ha ka Balang bad kumjuh ruh wat ha ka imlang ka sahlang.
Ïa kane ka lympung ïa kynduh lang ki Longkpa ka Balang Katholik Zone-VI la pynkut noh mynta ka sngi lyngba ka Mass Bakhuid ba la wan pyndep ïa ka niam ka rukom da Most Rev. Victor Lyngdoh kum u Lyngdohsad ba rangbah ha kaba la wan ruh ban shim bynta da ki paid riewngeit na ki saw tylli ki Parish kata ka Nongpoh, Umden, Umkadhor bad Byrnihat Parish.
Ha ka mass bakhuid nalor ka leh niam leh rukom bad ka ïa bam ïa sip ïa ka sacrament bakhuid, la ai ruh ïa ki kyntien sneng ki kyntien kraw da u Most Rev. Victor Lyngdoh kum u nongsharai ba rangbah, u ba la pynpaw ka jingkmen ban iohi ba ki Longkpa Katholik ki pynlong ïa kane ka lympung na ka bynta ban ïa tai, ïa thir bad ban saindur ïa ka kyrdan longkpa ha ka ïing ka sem, ha ka Balang bad ruh wat ha ka imlang ka sahlang.
Kumba ka kyntien phira ba la buh ha kane ka jingïakynduh lang, ka long, “Ieit, Shakri bad Ïalap’ na ka liang u Most Rev. Victor Lyngdoh u la ai ka jingkyntu kynpham ïa ki Longkpa ba ki dei ban tip ïa la ka kam ram kum u Longkpa bad lada ki Longkpa ki don ka jingkitkhlieh naduh na la ïing la sem, ha ka Balang bad ha ka imlang ka sahlang kan wan ka jingkylla bad kumjuh ruh ka suk ka sain ha ki ing ki sem bad wat ha ka imlang ka sahlang.
Da kaba sot ruh ïa ki kyntien na ka Bible, u Most Rev. Victor Lyngdoh u la ban khia ban ïalap ïa ka ktien ka jong u Blei bad ngi dei ban phla sha ka pyrthei ba u Trai u long u Nongpynim jongngi, da kaba u la ïap halor ka Diengpha ban pynim ïangi bad ka dei pat ka kamram jongngi ban ïalap ba baroh ki tip ba u Trai Jisu u long u Nongpynim jongngi.
Shuh shuh, u la kyntu ruh ïa ki Longkpa ba kin dei ban pyntreikam ïa ki symboh pyrkhat ba ki la ioh lum na kane ka lympung, ba ki dei ruh ban rah sha la ïing la sem bad sha ka Balang ban ïalap sha kiwei bad kum ki Longkpa kim dei ban don ka mynsiem jong ka jingduh jingkyrmen bad ki dei ban don kata ka mynsiem jong ka jingkhlieh ha la ïing la sem ,ha ka Balang bad ruh ha ka imlang ka sahlang ba ngin lah ban pyndep ïa ka deiti kaba la buh da u Blei Nongbuh Nongthaw, u la bynrap.
Hadien ka Mass bakhuid, la bud sa ka jingmane Sacrament ba la pyndep ïa ka niam ka rukom da u Fr. Glorious Syiemlieh, Parish Priest ka Umden Parish bad ha kane ka jingmane Sacrament leh burom ïa ka Eucharist Bakhuid da ka jingshonkun shong Blei ryngkat ki kyntien kyrkhu kyrdoh da ute u Lyngdoh sad bad la ioh ruh ka jingkren da u Bah Grigori Kharumnuid uba la kren halor ka phang ka jingsngewnguh ïa u Blei bad kumjuh ruh kumno ban don ka jingïadei hapdeng u Kpa bad ka kmie khnang ban skhem ka longing longsem.
La pynkut ruh ïa kane ka lympung da ka Cultural Programme ba la wan ban shim bynta lang da u MLA ka Nongpoh, u Bah Mayral Born Syiem bad kynthup naduh ki phadar, ki sister, ki rangbah balang, ki nongïalam ka synjuk bad ki paidbah riewngeit ka Balang Katholik. La don ruh ka jinshad tynrah bad kiwei ki prorkam kaba long kawei na ka thong ban pynneh ïa la ka kolshor, ki riti ki dustur, kiba ïa dei dur bad ka jonglong Khristan ha ka leh niam ka leh rukom.