La i shyrkhei ki khubor ba shah thombor ki kynthei, donkam ïa ka Council ban tuklar lem

Shillong, Jylliew 25 : Ka MDC jong ka Nongshken, Kong Grace Kharpuri ka la rah da ka motion ha ka Dorbar Mangtyngka jong ka KHADC ha kane ka sngi Balang ban kyntu ïa ka Council ban tuklar lang na ka bynta ban wad ïa ki lad ki lynti ban tehlakam ïa ka jingjur palat ki kam thombor ïa ki kynthei khynnah ha ka jylla.
Ka la ong ruh ba watla ki don bun ki ain ban ïada ïa ki kynthei khynnah na ka jingshah thombor pynban kine ki kam bymman ki dang ïai bteng ban ïoh jaka da kaba pynkynmaw ruh ba dang shen kawei ka longkmie na ka constituency jong ka ruh ka ngat lang ha katei ka lanot.
“Ngi la don lypa bun tylli ki ain ban ïada hynrei ngim lah pat ban ïada pura na ki kam thombor pyrshah ïa ki kynthei khynnah,” ka la ong.
Na ka liang ka MDC ka la kyntu ïa ka KHADC ba kan wad ki lad ki lynti kumno ban ïakhun pyrshah ïa kine ki kam thombor pyrshah ïa ki longkmie bad ki khunlung khynnah. “Ka Council ka dei ban don noh da ka Women Cell kaban ai jingïarap ïa ki lanot kiba ngat ha kum kitei ki jingjia shah thombor,” ka la ong.
Ha kawei pat ka liang ka la kyntu ruh ïa ka KHADC ba ka dei ban wad ki lad ki lynti kumno ban ai jinghikai ïa ki paidbah lyngba ki skul, ki dorbar shnong bad ruh lyngba ki balang. Ka banjur ruh halor ka jingdonkam jong ki kmie ki kpa ïa ka kamram kaba kyrpang ban pynsngewthuh ïa ki khun halor kane ka bynta.
“Kum ka KHADC kadei ban pynlong ïa kum kine ki prokram ai jinghikai khnang ban pynshlur ïa ki longkmie ba ki dei ban mih shakhmat ban ïakhun ïa kine ki kam bymman,” ka la ong.
Na ka liang ka Executive Member ba dei peit ïa ka tnad Law & Legal Matters, Kong Deiti Majaw ka la ong ba kane ka Executive Committee tang ha i por iba lyngkot ka jingtreikam jong ka, ka la lah ban thaw ïa ka komiti kumba la kdew ha ka Sexual Harassment Act bad thaw ïa ka ICC ha ka 20tarik u Jymmang mynta u snem.
Katkum ka jingong jong ka, watla ka jingpynbna na ka DCA halor kane ka bynta, hynrei ka Executive Barim ka khlem leh ei ei.
“Ka jingïalang kaba nyngkong jong ka Committee ka la long ha une u bnai Jylliew. Ngin bteng ban ïa kynduh bad ngin sa ai ruh ka jinghikai ban pynshai halor kane ka mat,”ka la ong.
Da kaba pyntip ba ka KHADC kam da donbor than halor kane, hynrei ka la ong pat ba ka EC kan sa shim lang ïa ka bynta ban ïakhun ïa kine ki kam thombor pyrshah ïa ki longkmie.
“Na ka liang ka EC kan sa treilang bad ki paidbah ban ai jinghikai bad ban pynshlur ïa ki longkmie ba kin mih shakhmat ban iakhun na ka bynta ka hok jong ki. ngin sa shimkhia ia kane ka ishu bad ruh ïa kiwe ipat kiba ktah ïa ki longkmie jongngi,” ka la ong.