Nongpoh, Jylliew 25: Ki nongïalam shnong jong ka shnong Pahamsyiem, ha Ri-Bhoi District mynta ka sngi ki la ïoh ban kem ïa uwei u samla u ba leit ban khrong pisa beaiñ na ki dukan bahap hapoh u pud u sam ka shnong Pahamsyiem hapdeng ka jingbuaid bad rah ryngkat ka shithi bad ka rusit jong ka seng Ri-Bhoi People Movement.
Ha ka jingtohkit ki nongïalam shnong ka shnong Pahamsyiem naduh u Bah Jedwin Lyngdoh Rangbah Shnong, Bah Wanphrang Sumer Assistant Rangbah Shnong, u tei u samla u dei u ba la tip kyrteng kum u Banker Syngkli na ka shnong Umdihar, Ri-Bhoi District bad phla ruh ba u la ïoh ban lum pisa na kawei ka dukan bad haka shithi kaba u rah la pynpaw ruh ba kadei kaba la thmu ban phah sha DMHO Ri-Bhoi District ban pan jingïarap pisa na ka bynta ka awareness prokram halor ka shongkha khynnah bad ka jingngop ha u drok bad ka tarik ban pynlong ïa katei ka prokram ruh la kdew ban pynlong haka 17 tarik Naiwieng 2023 ha Dorbar Hall ka shnong Umrit.
Shuh shuh u tei u samla u la phla ruh ba u donkti ha kiba bun ki kam tuh, khamtam ka jingleit prong bad pynpra ïa ka iingmane jong ka Balang Presbyterian ha Umdihar ha u snem ba la dep bad rongtuh ruh ïa ki tiar kyntang jong ka iingmane.
Na ka liang ka Dorbar Shnong Pahamsyiem tang hadien ba la ïoh kem bad dep tohkit ki la pyntip noh sha u Rangbah Shnong ka Umdihar ban aiti ïa utei u samla khnang ba ka shnong kan ïoh ban leh ïa kaba donkam.
Haba kren sha ki lad pathai khubor na ka liang u Bah Jedwin Lyngdoh Rangbah Shnong ka Pahamsyiem u la ong ba lada ki kynhun seng ki donkam kano kano ka jingïarap leit da ka lynti bad ai ka jingïatreilang bad ki nongïalam shnong, namar kum ka shnong kam kwah ban mih kano kano ka huri hura bad kam kwah ba kin don ki briew kiba shim kabu ha kyrteng jong ki kynhun seng bhalang ne kino kino ki kynhun ban myntoi shimet.
