La donkam ban peitngor bha ïa baroh ki Hostel ki khynnah ha ka jylla : ACWE

Shillong, Nailar 8 : Ka Assembly Committee on Women Empowerment (ACWE) mynta ka Lah Sngi u Blei ka la ai jingmut ba la donkam ban peitngor bha ïa baroh ki hostel jongki khynnah rit hapoh ka jylla khnang ban lait na kino kino ki jingjia ba sngewsih.
ïa kane ka rai la shim da ka Committee hadien ba ki pulit ki la ïoh ban pyllait im ïa hynriew ngut ki khynnah rit na ïing basa Rimpu Bagan, Tura kiba la set ha kawei ka kamra kaba jakhlia bha. Ki pulit ki la kem ïa u trai kane ka ïing basa uba dei u MDC ka Tura bad Vice President ka BJP u Bernard N Marak lem bad 73 ngut kiwei pat kiba don ha katei ka ïing basa ïa kaba la kynnoh da ki pulit ba ki ïaleh ïa ki kam awria.
Hadien ba la wai ka jingïalang bad ki heh jongka tnad Social Welfare, ka Chairperson jongka ACWE I Dr Ampareen Lyngdoh i la ong ban thaw ïa ki hostel na ka bynta ki khynnah rit dei ban ïoh ka jingmynjur na ka sorkar bad donkam ban ïai peitngor bha ïa ka rukom pynïaid khnang ban ym jia kumba la jia ha Rimpu Bagan, West Garo Hills.
“Baroh ki hostel ha ka jylla kiba ai jaka sah ïa ki khynnah rit kiba hapoh 18 snem ka rta dei ban peitngor bha. Dei ban don ka jingleit jurip ba kyndit kyndit, ki dei ban don ki jaka ban rejister khnang ban ym don kino kino ki jingthom beiñ ïa ki hok longbriew jongki” ong I Dr Ampareen iba dei ruh ka MLA jongka East Shillong.
“ Nga tharai ka sorkar Meghalaya ka la dei ban pynmih noh ïa ki kyndon bad bthah ruh ban peitngor bha ïa ki hostel ba pynsah ïa ki khynnah ba ki dei ban long kiba biang nadong shadong bab ba ym dei ban leh kino kino ki kam thombor ïa ki khynnah kumba la jia ha Rimpu Bagan” ong biang ka Chairperson.
“ Lyngba kine ki jingïakynduh kan ïarap ïa ngi ba ngin nang kumno ban peitngor nangne shakhmat bad ngi dei ban ïohi ruh ba ki jaka sah jong ki khynnah rit ki dei ban long kiba shngaiñ bad kiba don jingkyrmen ym kiba leh ïa ki kam thombein”, ong biang i Dr Ampareen.
Ha kaba ïadei bad kitei ki hynriew ngut ki briew ba la ïoh ban pyllait ka Social Welfare kan sa shimti ïa ki bad kan peit ba kin sah ha ki jaka kiba la pynkhreh da ka sorkar ïa ki khynnah rit bad ba kin ïoh ruh ban leit sha ki jingpule jongki. Dei ruh ban pynthikna ba kine ki khynnah ki dei ban ïoh ïa ka jingim kaba thymmai ka ba kin lah ban klet noh ïa kaei kaba ki la ïa kynduh. Ka tnad Social Welfare ka la kular ban peit ba kine baroh ki khynnah rit kiba la ïoh pyllait im kin im ka jingim kaba kmen hadien ba ki la lait na ka ktem jong ki kam awria.
Ka Committee ka la pan kaiphod ruh halor ki khun ki kti jong kito ki kmie ba shah pyniap dang shen. Ha kaba ïadei bad ka kong The Siangshai na East Jaintia Hills ka don 10 ngut ki khun bad na ka liang ka tnad ka la kular ba ïa kito kiba hapdeng ka rta 2 haduh 14 snem yn buh ha ki ïing ri ïa ki khynnah rit ha East Jaintia Hills bad ka tnad ruh kan ai jingïarap ïaki tad haduh ba kin da dap 18 snem ka rta. ïa uwei uba 18 snem yn phah hikai khapsniuh. ïa ki arngut ki khun jongka kong G.Bareh kata ba 8 bad 12 snem ka rta yn ri da ka kmie rad jongki bad yn ïarap ruh da ka sorkar.
Haba ia dei bad ka jingjia ha Nognrah kaba ki ar ngut ki khun kila shah pyniap ha la u jong u kpa, ka sorkar kala dep ban ai jingïarap shilak tyngka bad mynta ka dang pynkhreh ban ïarap shuh sa san lak tyngka ba ka long ïing kan lah ban ïa khun ïa ka mukotduma.