Nongstoiñ, Risaw 16: Na ka bynta ban pynsngewthuh kham bha ïa ki nongrep kumno ban ïada ïa ki jingthung jingtep, na ka jingpynjot jong ki khñiang khamtam eh ïa u kba bad riewhadem, ki nongrep na ka thaiñ Mawlangdep, Mawliehbah Mawnar bad kiwei kiwei ki shnong kin pynlong ïa ka jingïakynduh lang ha Mawlangdep ha ka 18 tarik kaba dei ka sngi balang.
U bah Dominik Lyngkhoi convener jong ki nongrep, u la ong ba ha kine ki snem ba la dep ki don ki kynja khñiang kiba pynjot ïa u kba ha ka por ba u la sdang ih, da kaba ki bam pyndkut ïa u soh kba bad ka la pynduhnong haduh katta katta ïa ki nongrep bad don ruh ki bym shym la ot shuh ïa u kba namar don satang ki jyntang suda ki soh kba pat ki la hap lut sha madan.
Nalor kata u la ong ba kiba rep riewhadem ha ki kper lei lei kim ïoh kheit riewhadem shuh, namar utei u juh u jait khñiang u bam ïa u jyntang riew hadem naduh dang rit da kaba rung na sha kliar bad ksam haduh shapoh u jyntang. U la ong ruh ba haba u la lap ïa kitei ki jait khñiang u la pyrshang ban synreit da ki dawai hynrei kim ïap satia.
U bah Lyngkhoi u la ong ruh ba dei halor katei ka jingeh ba u la hap ban lum ïa ki para nongrep ha katei ka sngi, ha kaba ki ophisar na ka tnad Agriculture bad Horticulture ryngkat ki nongïalam jong ka Meghalaya Farmers Union, kin ïa don ryngkat ban pynshai sha ki paitbah nongrep kumno ban ïada na ka jingpynjot ki khñiang ïa ki jingthung jingtep.
Kin pynshai ruh kumno ban shalan ïa ki mar rep ba ki pynmih bad ha katei ka sngi la khmih lynti ba ki nongrep na ki shiphew tylli ki shnong ïa kiba u la dep pyntip ki lah ban ïa poi.
