Shillong, Risaw, 17: Ka Deputy Commissioner jong ka East Khasi Hills District ka Kong RM Kurbah ha ka Lah Sngi u Blei ka la pynjari da ka Section 144 CrPC kaba mana ïa ki paidbah ba kim dei ban pyntuid ïa ki jaboh jaboh sha Pung Umïam da kaba pyntreikam ïa ka hukum jong ka Ingbishar Meghalaya High Court kaba la pynmih ha ka 3 tarik, Risaw, 2023 kaba bthah ban wanrah biang ïa ka jingkhuid jingsuba jong ka Pung Umïam da kaba pynthikna ïa ka jingkhuid jingsuba jong baroh ki wah kiba tuid sha kane ka pung.’
“La lap ba ka jingbret pathar ïa ki jaboh jabaiñ sha ka pung da ki nongleit jingleit, ki nongleit bam khana, ki nongdie dukan bad kiba buh ïa ki dukan paki dulan bad kiwei kiwei. La sngewdei ba ka long kaba donkam ban khanglad ïa kine ki kam be-aiñ na ka bynta ka bha ka miat jong ki paidbah,” la ong ka Hukum ba la pynmih da ka Deputy Commissioner.
Namarkata, ban pynthikna ïa ka jingkhuid jong ka pung bad ki sawdong sawkun, ka Deputy Commissioner ka la mana tyngeh katkum ka Section 144 CrPC ban pyntuid jaboh, ne ban pyntuid ruh ïa ka um jaboh sha pung Umïam na baroh ki jaka kiba hap hapoh u pud u sam jong ka East Khasi Hills District.
“Namarba kane kam ka long kaba kyrkieh, kane ka hukum kan treikam noh mardor ha baroh ki jaka ba la kdew hangne tad haduh ban da pynbna da kumwei pat,” la ong ka hukum na ka Deputy Commissioner.
