Shillong, Risaw 16 : U Lat ka jylla u Phagu Chauhan ula pynpaw ka jingsngewsih bad phah ruh ïa ka khubor sngewlem sha ki long ïing longsem jong ki arngut ki IAS Ophisar kiba la shongthait na ka kam kiba la khlad noh na kane ka pyrthei. Kine ki long bah S.F Khongwir ba la khlad noh ha ka 14 tarik bad bah D.K Dkhar ba la khlad noh ha ka 15 tarik mynta u bnai.
Kine baroh arngut ki dei ki shakri sorkar kiba la trei hok ïa ka kam na ka bynta ka jingroi jingkiew ka jylla Meghalaya. Ka jingnoh synniang bad aiti lut jongki ha kiba bun ki bynta yn ïai pyrto junom ong ka kyrwoh na u Lat.
Ka jinglong shai ka jingmut jingpyrkhat jongki bad ka jingtrei shitom ïa ka kam ka long ka nuksa ïa kiba bun ki nongtrei sorkar. Ka jingkhlad noh jongki ka long ka jingduh kaba khraw ïa ki paid nongshong shnong ka jylla. U Lat ym tang ba u phah ïa ka khubor sngewlem hynrei u buh ruh ha ki jingduwai ïa ki longïing longsem jong kine ki arngut ki Rangbah kiba la khlad noh na kane ka pyrthei.
