Tel Aviv, Risaw 16: Hapdeng ka jingbyrngem ban hiar thma noh na ryngkew bad ka jingpynap lypa ïa ki shipai ki swar bad ki tup ki man, ki shipai Israel Defence Forces (IDF) ki lah ban mad jingeh na ki tunnel ne ki liew krem ba la tih khnang da ki lehnoh Hamas.
Kine ki tunnel kidei kiba la don naduh ki snem baladep,naduh ba ki Hamas ki la shimti ïa ka jingsynshar ha Gaza ha ka snem 2007. Hynrei ha ka snem 2011, haba la khie ka thma hapdeng ka jingïakhun ki shipai Israel bad ki Hamas, ki shipai IDF ki la pyntwa ïa kiba bun tylli kine ki tunnel.
Hynrei ki Hamas ki la shna biang ïa kine ki tunnel kiba kham khlaiñ, kiba khambha bad kiba lah ban poi shaduh Israel. Dei lyngba kine ki tunnel ba ki Hamas ki rung tuh sha ki bynta jong ka Israel ban pynbthei bom bad leh ia kiwei de ki kam pyntriem. Kine ki tunnel ki don ruh shaduh khappud bad ka Egypt, ha kaba la ju khaïi ruh ïa ki mar ki mata.
La ong ruh ba ha kine ki tunnel, ki Hamas ki buhrieh ïa ki tiar thma jong ki. Hadien jong ka 7 tarik mynta u bnai, ka sngi ba ki lehnoh Hamas ki la hiar thma kyndit ïa ka Israel, ki khubor ba la ïoh ki ïathuh ba ki Hamas ki lah ban pynrieh ïa ki briew ba la shah rahbor ha kine ki tunnel. Ki khubor ki ong ba lah ban dei na kane ka daw ba ka Israel ka la pynsuki noh shuwa ka jinghiar thma ryngkew sha Gaza.
Shuh shuh, ki khubor ki ong ba kine ki tunnel ki long kiba skhem bha bad ym lah satia ba shu pynpra tang da kaba pynhap da u bom na jrong suiñ, hynrei donkam ban ïoh rung shapoh. Kine ki tunnel ki don ki jaka rung jaka mih sha ki skul, ki jaka mane blei bad ki jaka paidbah. La ïathuh ba kine ki tunnel ki poi ruh sha ki bynta kiba ki Hamas ki la siat ïa ki rovket jong ki myn ha ka sngi Saitjaiñ.
Ki kyrwoh na ri Palestine ki ïathuh ba ki Hamas ha shuwa ban kin hiar thma ïa ka Israel ha ka 7 tarik, ki la pynkhreh lypa ruh ïa ka jingwan hiar thma ki IDF na ryngkew bad ki la pynap lypa ruh ban khyrwit ïa ki ne kine ki tunnel. Nalorkata ruh ki la pynkhreh lypa ruh ba pynbthei ïa kine ki tunnel ha ka por ba ki shipai Israel ki ïaid na jrong jong kine ki tunnel.
