Shah kynnoh ki nongdie madan ha Police Bazar ba pynwit ïa ki kali pynlip ding

Shillong, Risaw, 16: Ka seng ki nongdie madan ka Meghalaya & Greater Shillong Progressive Hawkers and Street Vendors Association ka la pynpaw ïa ka jingsngewsih bad ka jingsngewlem ïa ka longiing jong ki Singhania kiba la duhnoh ïa ka iing namar ka jingbamduh jong ka ding ha ka sngi Saitjaiñ jong ka taiew baladep.
Ka Seng ka pynpaw ruh ïa ka jingsngewlem ïa ki bahaiing sem jong uba la khlad ha kane ka jingpluh ding kaba shyrkhei.
“K a Seng ka pynpaw ïa ka jingsngewdiaw bad ka jingpyrshah kaba jur ïa ki jingkynthoh bad ki jingkynnoh jong ki katto katne kiba ong ba ki nongdie madan ki khang lynti ïa ki kali pynlip ding bad kumta ka ding ka ïohlad ban bam shngiam ïa ka iing. Ka Seng ki nongdie madan kam lah ban pdiang ïa kum kine ki jingkynnoh ki bym shongnia,” la ong u General Secretary ka Seng u Bah Shane Thabah ha u kyrwoh ba la phah sha ki lad pathai khubor.
“Ha ka jingshisha ka seng ki nongdie madan ka la kyntu ïa ki bor shnong ne ki bor synshar distrik ba ki dei ban da ïitkhmih ïa ka jinglong jong ka Sor Shillong mynta halor ka jingtei thurmur ïa ki iing ki sem bad ban pynlong ka jingjurip kaba bniah halor ka rukom shna ïa ki iing ki sem bad ki dukan paki dulan. Ban thaw ïa ka kynhun jurip kaba laitluid ban jurip halor ka jingshngaiñ jong ki iing, ki jingtei iing bad ki dukan paki dulan kiba don ha Khyndai Lad bad kylleng ka Nongbah,” la ong ka Seng.
“Ka Seng ka pynpaw shai kdar ba ha kine ki phew snem ba la leit noh la pynjot ïa ka Sor Shillong da ka jingrhah spah bad jingkhwan myntoi shimet bad ki nongkhaii, ki riewshimet ki leh katba mon haba ki tei ïa ki iing bad kiwei ki jingtei kim salia ïa ki aiñ ki kyndon bad pylleiñ pylleiñ ki pynkheiñ ïa ki. Ki bor ba dei khmih ruh kim pushe ne kitkhia,” la kynnoh ka Seng.
Haba pynkynmaw ïa ki jingpluh ding kiba la la jia ha ki khyndiat snem ba la leit noh, ka seng ka la ong, “kum ban shu pynkynmaw ba dang shen kawei ka ïingmane ha Qualapaty ka la pluh bad ingkhong khait bad ar ngut ki mynsiem briew ki la shu duh ei. Ha kane ka jingjia ki kali pynlip ding kiba heh kim shym lah satia ban rung sha ka jaka namar ka jingrit jong ka surok ïaid kali. Kajuh ka jingjia pluh ding ka la jia ha ki khyndiat bnai ba la lah ha kaba ka skul KJP Girls Higher Secondary School ha Mission Compound ka la ingkhong bad ha kane ruh ki kali pynlip ding kim lah satia ban poi haduh ha shen namar kim lait ban rung namarba khim palat ki surok.”
“Ha ka jingshisha ha ka jingpluh ka iing ha Khyndai Lad ha ka sngi Saitjaiñ ki nongdie madan bad ki dkhot jong ka Seng ki la lum marmar ïa ki mar ki mata jong ki bad khang mardor ïa ki jingdie. Ki la mareh ruh sha ka jaka ba pluh ban ai ka kti ka jingïarap watla ki dei ban buh ïalade ha ka jingma. Kumta ki nongdie madan kim shym la khang lynti, pynban ki la ai ka kti jong ka jingïarap,” la pynshai ka seng.
Ka Seng ka kloi ban ïatrei lang bad ki bor synshar distrik bad ka Sorkar ban tei bad ban pynlong ïa ka Sor Shillong kaba shngaiñ bad kaba burom kylliang.