Shillong, Risaw 16 : Ka sorkar jylla ka la thung da ka jingtohkit Majistor (Magisterial Enquiry) halor ka jingpluh ka ïing paki dulan ha ka 14 tarik mynta u bnai ha Police Bazar.
“ La thung ïa ka jingtohkit Majistor da ka Deputy Commissioner bad ngi khmih lynti ban ïoh ïa ka kaiphod kaba bniah hapoh shiphew sngi” ïathuh u Commissioner bad Secretary ka Revenue bad Disaster Management u Sanjay Goyal.
ïa kane ka jingtohkit yn khlieh da I Additional Deputy Commissioner (ADC)
U Goyal ula ïathuh ba ka sorkar ka la khot ruh ïa ka National Institute of Technology (NIT) ban sorjamin bniah ym tang ïa ka ïing paki dulan Janata Furniture kaba la pluh hynrei wat ïa ki ïing paki dulan ba marjan kum ka Payal Cinema bad kiwei. Ka NIT kan leh ïa kaba donkam bad hadien kata yn sa lah ban shim rai halor ka jinglong jingman kine ki ïing paki dulan
U la ïathuh ba kane ka jingtohkit kan tohkit ruh halor ka jingshim por ban lah pynlip ïa ka ding. U la ïathuh ba la hap ban pyndonkam haduh 25 tylli ki kali pynlip ding tang ha katei ka sngi ba jia ka jingpluh.
Lah ruh ban pynkynmaw ba uwei u briew u la iap na ka daw ba u sahkut shapoh bad u iap na ka jingiap up na ka tdem.
