Nongstoiñ, Lber 3: Lehraiñ ban ong ba ki dei kita ki nongmihkhmat paidbah, haba wat ban plie ne pyntreikam noh ïa ka Polytechnic Nongstoiñ, kaba la 16 snem mynta ka kam ka la ïaid hynrei ym shym la lah satia ban plie. Kane baroh ka dei ka jingjah burom ïa ka sorkar ka bym shym la shimkhia ei ei bad imat ym kheiñ snep ei ei ïa ki paidbah nongkyndong jong ka West Khasi Hills.
Halor kane, na ka liang ka seng Federation of Khasi Jaiñtia and Garo People Nongstoiñ pyllun, mynta ka sngi hapoh ka jingïalam u bah Ananstar Peiñlang Lamphang, ka la leit ban pan jingshai halor ka jingsangeh noh ban pyntrei ïa ka Polytechnic kaba don ha ka shnong Mawrusyiar.
Katei ka jaka pule Polytechnic kaba don ha shnong Mawrusyiar, Nongstoiñ West Khasi Hills District katkum ka jingïoh jingtip kadei kaba la mang pisa kyrpang na ka sorkar pdeng lyngba ka tnad Ministry of Human Resource Development (MHRD) naduh u snem 2009.
Kumta ka seng ka kwah ban tip na u DC ba hato ïa katei ka kam la pynsangeh ne ka dang ïaid bad lada ka dang ïaid ha kano ka bynta ka sahkut la kylli kitei ki nongkitkam jong ka seng.
Halor kane ka bynta na ka liang u DC kata u bah Garod LSN Dykes, u la pynshai ba ïa mynta ka Scheme Ministry of Human Resources Development (MHRD) 2009 ka la lut noh, kumta ïa ki kam ba dang sah ka shong satang ha ka sorkar jylla Meghalaya ban pyndep.
Ka seng ka la ong shuh shuh ba dang bun ki kam kiba dang sah khongreng ha katei ka shlem, kumta na ka liang ka seng ka kyntu ïa ka Sorkar jylla Meghalaya ban pyndep noh kham kloi ban tei dep noh ïa katei ka Shlem.
Ka jingdon jong kane ka jaka pule kan ai jingmyntoi shibun eh ïa ki khun samla ka District, kan long ruh ka jingkyrkhu khamtam ïa ki khun ba duk ba suk ba kin ïoh ban bteng ïa ka jingpule ha kaba ïadei bad katei ka laiñ, ong ki nongïalam jong ka seng.
