Shillong, Nailar, 13: Ka jingïakhih ba khlem pud sngi jong ki nongtrei SSA kiba don hapoh ka shatri jong ka All Meghalaya SSA Non-Teaching Staffs Association (ASNSA) ka la kynjoh sha ka sngi kaba khatsaw ban pynbor ïa ka Sorkar Jylla ban pynurlong ïa ka jingdawa ban kyntiew ïa ka tulop kaba 80 percent.
Ha ka jingïakren bad u nonglum khubor ha ka sngi Baar, ka President jong ka Association ka Kong Jenifer Synrem ka la ïathuh ba ha ka jingïakynduh biang ïa u Commissioner and Secretary ka tnat Pule Puthi u Vijay Kumar Mantri kum ki dkhot jong ka Rationalisation Committee ki la pyrshang ban ïapynbiang tarajur ïa ka rukom siew tulop na ka bynta ki nongtrei kiba trei ha ka State Level, ha ki District bad ha ki Block.
Ka la ïathuh ba dei lyngba ka jingwan jngoh jong ka Myntri ka Sorkar Jylla ka Dr. Ampareen Lyngdoh ba ka la shimkhia ban ïakren bad u Commissioner and Secretary ka tnat Pule Puthi u Vijay Kumar Mantri ban ïapynbeit biang ïa ka rukom siew tulop.
Ïa ka jingkheiñ jingdiah ngin sa phah sha u Director khnang ba un bishar haduh katno ka Sorkar ka lah ban kyntiew ïa ka jingdawa ban siew ïa ka tulop kaba 80 percent.
“Haoid, ka kam ka la kham slem, mynshwa ngim pat ju don ka Rationalisation Committee ha kaba ma ngi ki nongïakhih ruh ngin don bynta lang ha ka komiti. Kane ka Committee ka dang im beit bad kan dang treikam ruh ha ki snem ki ban dang wan khnang ban bishar bad ban khmih bniah ïa ka rukom siew tulop namarba la slem bha ïa ka tulop jong ngi ym shym la kyntiew shuh na ka jingsiew ïa ka tulop kaba rim,” la ong ka Kong Synrem.
Ka la ïathuh ba ha ka sngi rakhe ïa ka jingïoh laitluid jong ka ri India ha ka 15 tarik mynta u bnai, ki dkhot jong ka seng kin sa pynlong ïa ka jingrakhe ha ka jaka ba pynlong ïa ka jingïakhih ha Madan Malki.
