19 tarik ka jingtian bishar ba khatduh halor ka jingshah siat ïap u Bah Cherish

Shillong, Nailar 13 : Ka jingshah dkhat jubor ka mynsiem jong u nongïalam ba rim ka seng Hynñiewtrep National Liberation Council (HNLC), lai snem mynshuwa kaba la jia haka 13 tarik u Nailar 2021, haduh mynta kam pat shym la pyntngen ïa ka ïing ka sem jong une u rangbah uba la shah pynlong sohpdung ha ki pulit ban leit siat ïap ïa u shiteng synnia haka ïing sah jongu ha Mawlai Kynton Massar watla u don hapdeng ka jingshitom ka met.
Nalor ki bahaïing hasem kiba dang sah nud haduh mynta ïa ka jingshah dkhat jubor noh ka jingim jongu khlem pat dei ka por, khamtam ba u don hapdeng ka met ka bym koit bym khiah, ki paidbah ruh haduh mynta kim pat lah ban klet ïa kane ka jingjia, khamtam ki seng bhalang ka Ri Lum ka Bri U Hynñiewtrep.
Haka lyngkhuh sngi ïap kaba lai jong u Bah Cheristerfield Thangkhiew haka 13 tarik u Nailar 2024, nalor ki bahaïing hasem, kiba la leit buh syntiew ha u lum jingtep, ki seng bhalang jong kane ka Ri Lum Khasi bad Jaiñtia ruh ki la ïapoi khrui ban kynmaw burom ïa une u rangbah ba ieid jaid bynriew, ryngkat ki pansngiat syntiew ban buh ha u mot jingtep jongu ryngkat ka jingleh burom bad kynmaw ïa ki kam jongu.
Ki seng bhalang kiba la wan ïashim bynta ha kane ka jingïalang kynmaw lyngkhuh sngi ïap kaba lai jong u Bah Cheristerfield Thangkhiew, ki kynthup ï aka Khasi Students’ Union, ka Federation of Khasi Jaintia and Garo People, ka Hynñiewtrep National Youth Front, kumjuh n aka liang ka seng saiñ pyrthei ka Khun Hynñiewtrep National Awakening Movement, ka Seng Samla Mawlai bad kiwei.
Ki nongkren ha kane ka sngi, ki la pynpaw ïa ka jingsngew bitar haduh mynta ïa ka jingleh donbor ki pulit haka 13 tarik u Nailar 2021, ha kaba ki la leit ban khynra ïa ka ïing jong u Bah Cheristerfield Thangkhiew, shiteng synnia bad dkhat jubor ïa ka jingim jongu da kaba siat da ki ktang suloi, watla u don hapdeng ka met kaba um lah satia ban ïaleh pyrshah ïaki.
Ki seng bhalang ha kane sngi, sa shisien ki la pynrem jur ïa kane ka jingleh ki pulit lai snem mynshuwa, bad ki da pynpaw ruh ka jingshong syier ïa ki riew paidbah, lada ka sorkar kam lah ban the lakam ïa ka iktiar jong ki pulit ban ïaid katkum ka Aiñ kaba long salonsar ïa baroh. Ha kane ka sngi, ki bahaïing hasem ryngkat ki seng bhalang, ki khmih lynti ruh ba u Bah Cheristerfield Thangkhiew un ïoh ka jingbishar kaba hok lada ka Ïing Bishar ka rai pynrem ïa ki briew kiba don kti ha kaba siat ïap ïa une u rangbah.
Ka jingtian bishar kaba khatduh halor kane ka mukotduma jong ka jingshah siat ïap u Bah Cheristerfield Thangkhiew, kan long haka 19 tarik mynta u Nailar 2024, bad ki bahaïing hasem mynta ki don hapdeng ka jingkhmih lynti bad lynga pisa kaei kaba ka Ïing Bishar kan ai ïa ka rai kaba khatduh.
2 taïew shuwa ban shah pynïap la wan byrngem teng ki pulit Khasi ïa u Bah Cheristerfield Thangkhiew
Ki bahaïing ki la ïathuh ba haka snem 2021, ar taïew shuwa ba u Bah Cheristerfield Thangkhiew un shah siat ïap haki pulit haka 13 tarik u Nailar 2024, ki la don ar ngut ki pulit Khasi kiba la wan byrngem lypa haka ïing sah jongu ha Mawlai Kynton Massar.
Kumta haka sngi ba ka longïing ka la kynmaw burom ia ka lyngkhuh sngi ïap kaba lai jong u Bah Cheristerfield Thangkhiew, lyngba u para jong u, u Bah Granary S. Thangkhiew, ki la ïawer ïa kine ki ar ngut ki pulit Khasi kiba la wan ban byrngem byrsit ar taïew shuwa ban siat ïa u hymmen jongu, ban phla ba dei mano kiba la phah byrngem bad phah siat ïap ïa une u rangbah, watla haka por ba u shah siat u don hapdeng ka jingshitom bad um ruh ka bor ban ïakhun pyrshah.
U Bah Granary S. Thangkhiew ula dawa na kine ki arngut ki pulit Khasi kiba la wan byrngem byrsit ba kin wan sha khmat lane ban leit ïakynduh ïa ki bahaïing jong u Bah Cheristerfield Thangkhiew ban phla ïa ki kyrteng jong kita kiba phah byrngem bad phah siat ïap ïa u hymmen jongu, namar ki bahaïing hasem jong u Bah Bah Cheristerfield Thangkhiew ki ithuh bha ïa kine ki ar ngut bad ki tip ruh ïaka kyrteng jongki.