Mairang, Lber, 15: U Assistant Secretary jong ka seng HSPDP Maw-thadraishan Constituency u Bah Kotbor Warjri u la pynpaw ba ka jingleit ai jingkyrshan jong MLA u Bah Shakliar Warjri ïa ka NPP ban thaw ïa ka Sorkar ka dei na ka bynta ba un lah ban wanrah ïa ki kam pynroi ki bapher bapher hapoh ka Constituency bad ba un dup lah ban ïarap na ka bynta ki jingdonkam kiba bun jong u paidbah.
U la ong ba u Bah Warjri haba u leit ban ai ïa ka jingkyrshan ïa ka NPP ban thaw Sorkar u leit ruh ha ryngkat ki nongrim kiba skhem jong ka party ban ïada ïa ka ri bad ka jaitbynriew ym kumba la mih ki jingkren ba u dei u nongdie ïa ka ri.
U Bah Kotbor u la kyrpad ruh ïa ki nongshong shnong jong ka Mawthad-raishan ban shah ïa u Bah Shakliar ba un don lang ha ka Sorkar ban ïalam da ka National Peoples Party (NPP) bad ban peit aiu kane ka sorkar ka trei bad lada ka bakla na kaei kaei kaba ki paidbah ki sngewpyrshah ïa ka jingtreikam jong ka na ka liang u MLA bad ka party ki kloi ban weng ïa ka jingkyrshan na ka sorkar.
U la ong ruh ba u kyrmen ba kane ka Sorkar kaba thymmai kan dei ka Sorkar kaba trei bha na ka bynta ka jylla.
