Ka synshar bakhuid kan ym don ha ka jylla katba ki paitbah kim pat sngewthuh

Nongstoiñ : Ka synshar khaddar kaba khuid ba suba ka dei ka mat kaba la ju ïakren la slem bha ha kane ka jylla jong ngi, hynrei haduh mynta kam pat urlong satia namar ba naduh ki nongmihkhmat haduh ki paitbah, kim pat sngewthuh satia kaei kata ka jingsynshar kaba khuid.
Haba phai ha katei ka mat, ym lah ban len ba ha ki snem ba la dep u bah Ardent Miller Basaïawmoit u dei uwei na ki rangbah, kiba la sdang ban pynshai sha ki paitbah halor katei ka mat lyngba ka “Clean politics” bad u la ïaid ha kylleng ki jaka ban pynsngewthuh, da kaba pynlong ïa ki jingïalang paitbah ban pynsngewthuh, hynrei imat ka jingpyrshang jong u kam shym la treikam satia.
Nalor kata ki la don ruh ki nongïalam jong ki kynhun balang Khristan kiba la thaw da ka kynhun kaba la tip kum ka Khasi Jaiñtia Church Leader Forum, kiba la pyrshang katba kot la ka bor ban pynsngewthuh sha ki paitbah, ba kim dei ban jied ïa ki nongmihkhmat da kaba khmih lynti ba kin ïoh pisa. Hynrei katei ka jingpyr-shang jong ki nongïalam balang ruh kam pat treikam satia ha uwei pa uwei, lait noh tang ha ki katto katne ngut.
Kumba ka long ha kine ki snem ba la dep ba ka sorkar MDA ba la lam khmat da ka NPP ka dang synshar ïa ka jylla, ki paitbah ki la ud ki la thnum, ki la tim la tla haduh ba ym sngew ïahap shuh. Pynban hadien kane ka election kaba dang shu dep, ka NPP ka dei ka party kaba jop bun tam ki MLA bad kan dang ïalam hi ïa ka sorkar, namar ka BJP kam lah da lei lei ban khlad na ka NPP, namar ka dei ka juh ka party, ka don ki juh ki nongrim bad ki juh ki jingthmu. Ka NPP ka la jop bun tam ki MLA ka dei na Garo Hills namar shuwa ban poi ka sngi thep vote u Amit Shah u la wan ïalap election ha Tura.
Haba phai pat ha Khasi bad Jaiñtia Hills, ka NPP ka la jop tang hynñiew ngut na ki laiphew san tylli ki constituency kata saw ngut ha Jaiñtia hilla bad ar ngut ha them Ribhoi katba ha East, West South West bad Eastern West Khasi Hills ki kyrtong ka NPP ki la shah rem lut.
Haba phai sha ka jinglong jingman ha Khasi Jaiñtia, la ïohi ruh ba ka party ba dang thymmai kaba la seng da u bah Ardent Miller Basaïawmoit ka Voice of Peoples Party, kaba don ïa ka thong b an wanrah ïa ka synshar khaddar kaba khuid ba suba wat la ka dang shu sdang ruh ka la lah ban pynjop haduh saw ngut ki kyrtong.Kane ka pynishai ba ki paitbah ha Khasi Hills ki la sdang ban sngewthuh ba ka jingsynshar kaba khuid ka la don kam eh ha kane ka pateng mynta.
Ki katto katne ki jingshisha kiba la paw ha kane ka election ba la dep ki long kumne, baroh ngi tip ba ka United Democratic Party (UDP) ha kane ka election ba la dep, ka la pynïeng saw ngut ki kyrtong na Garo Hills hynrei ym don wat uwei u ba jop. Kane ka pynishai kdar ba ki paitbah Gro kin ym pdiang da lei lei ïa ki party Khasi, katba ki Khasi Jaiñtia pat ki pdiang bad kyrshan tyngeh ïa ka party kaba na Garo Hills.
Ym lah ruh ban len ba ha West Khasi Hills, dei tang ki paitbah jong ka Rambrai Jyrngam Constituency, kiba dang sahdien tam bad ki bym pat sngewthuh kumno ban jied nongmihkhmat, namar ha katei ka Constituency ki don san ngut ki Khasi kiba dei ki kyrtong ha ka election kata u bah Kimfa S Marbañiang, u bah Fernandes Dkhar, u bah K.P Pangñiang, u bah Spastarlin Nongrem bad u bah Goldenstar Nonglong bad na ki Garo pat ki don lai ngut u R.G.Momin u Francis Pondit R Sangma bad u Silash R Marak.
Ha ka jingshisha ki paitbah ka Rambrai Jyrngam, ki la dei ban pynjop uwei napdeng kitei ki saw ngut kampher la u dei na kano kano ka party ruh, lait noh ïa u kyrtong ka BJP bad NPP, namar ki dei na ka juh ka ïing.
Hynrei ka jingbiej jong ki ka la paw pyrthei da kaba ki la pynjop pynban ïa u R,G Momin u ba dei u kyrtong shimet bad u bym nang bha wat ban kren Khasi ruh. Nangne sha khmat lada ki paitbah ka Rambrai Jyrngam kim pyrkhat bha kin sa shem jingeh kiba bun ki liang.