Shillong, Rymphang 10 : Hadien ka jingpynbna jong u MLA banyngkong ka Mawlai uba la long MLA haduh san sien khlem shah rem, u Bah SD Khongwir ban kyrshan ïa u kyrtong ka National Peopl’s Party (NPP) na Mawlai, mynta ka sngi ka 10 tarik Rymphang sa u MDC ba la jop ar sien khlem shah rem jong ka Mawlai, u Babu Linus Shadap u la leit ban long u dkhot jong ka NPP da ka jingthmu ban pynjop don burom ïa u kyrtong ka NPP, u Bah Teiborlang Pathaw ha kane ka election.
Kumba ka paw mynta ki riew pawkhmat bad ki nongïalam ba radbah jong ka shnong Mawlai ki la pynpaw paidbah ban ai ka jingkyrshan kaba pura ïa u MDC ka Mawlai u ban ïakhun ia ka election MLA
mynta u snem.
U Babu Linus Shadap udei u MDC ka Mawlai naduh u snem 1979 haduh 1989 bad udei uba la shongthait ruh na ka kam hikai. ïa u Babu Linus la leit ban pdiang sngewbha sha ka NPP ha ka jingïakynduh lang
kaba la long ha ïing sah jongu ha Mawlai Mawdatbaki, ha kaba la don lang u Babu Moris Lyngdoh uba dei
u nonghikai ba la shongthait na ka kam bad uba dei u nongkyrshan ba radbah jong u Bah Teibor bad kumjuh u Bah George Kharmujai uba dei u ophisar ba la shongthait jong ka Sorkar Jylla, bad uba dei u nongïalam ka NPP Mawlai.
Hashwa jong kane ka election u Babu Linus udei u rangbah uba ïatreilang bad uba kyrshan radbah ïa u MLA barim, u Bah PT Sawkmie.
Haba kren ha kane ka jingïalang ba lyngkot, u Babu Linus u la ong ka daw ba u la leit ban kyrshan ïa u Bah Teibor ka long namar une u samla rangbah u dei uba ïohi jngai bad uba pyrkhat ïa ki khun samla ba kin im shirta da kaba wad ïa ki lad ki lynti kumno ban pynbiang ïa ki kam ki jam, katba kiwei ki pyrkhat tang ïa ka 5 snem ba kin jop biang.
Na ka liang u Babu Moris Lyngdoh u la ong ba ka jingwan jong ki riew rangbah ban kyrshan ïa u Bah Teibor Pathaw kadei namar ki la ïohi ïa ka lawei jong ka shnong Mawlai bad khamtam ïaka lawei jong ki samla ka shnong Mawlai
