Wan ïatainia paramarwei lada phi ong ba nga khlem leh ei ei ha ki san snem kob u bah Samlin ïa u bah HDR

Shillong, Rymphang 10: U kyrtong ka National People’s Party (NPP) na Sohïong, u Bah Samlin Malngiang u la wer ïa u MLA barim uba dei u kyrtong ka United Democratic Party (UDP), u Bah HDR Lyngdoh ban ïatainia markhmat lada u ong ba ha ki san snem u Bah Samlin u khlem leh eiei na ka bynta ka konstitwensi.
Haba kren ha ka jingïalang pynskhem ïa ki nongkitkam ka NPP ha Weilyngkut, u kyrtong ka NPP u la ong ba tang ha katei ka thaiñ kum u MLA u la lah ban pynsiang rong ïa ka surok haduh T.6 klur ka jingpynlut bad kumjuh ïa ka surok na Mawpun kumba T.3 klur nalor kiwei kiwei ki surok sha ki shnong kiba khlem ïoh surok mynta la bun phew snem.
“Lada u kyrtong ka UDP u ong ba nga khlem leh eiei ha kine ki san snem, khot da ka jingïatainia ngin ïa kren paramarwei,” u la ong.U la ong ba ka kam ba u Bah HDR Lyngdoh um lah ban leh ha ki 25 snem, mynta u la lah ban pyndep ha ki 5 snem, bad bynrap ba ha ki san snem ki kam ki la paw la ha ki shnong ne kiwei ki kam naduh ka um, ki jaka pule.
“Shwa ban leit biang sha ka ilekshon u Bah Samlin u la pyndep lut bad pynkhuid lut, bad ïa ki jingkhein jingdiah la ai lut sha ki paidbah,” la ong u kyrtong ka NPP.Ha kaba ïadei bad ka jingkynthoh ba un ïakynduh jingeh ba u leit ban ïakhun na ka seng NPP, u Bah Samlin u la ong ba kam don jingeh katba u paidbah u dang ieid, hynrei un ïoh ïa ka jingjop ba donburom.
“Ki wanrah ishu ïa ka NPP kaba la seng ha Meghalaya da kaba ong ba kadei ka party Garo, hangno la thoh party Garo? la thoh NPP kaba mut ka party jong u paidbah,” u la ong shuh shuh u Bah Samlin.