Kyrshan ka HYC ïa ka Bill ba wanrah u Bah Adelbert halor ka bhah pule sha ki kyrdan ba shalor

Shillong, Lber 22: Ka Hynñiewtrep Youth’s Council ha ka sngi Balang ka la pynpaw ïa ka jimngkyrshan kaba pura ïa ka aiñrew (Bill) ïa kaba la tip kum ka The Meghalaya Selection of Candidates for State Quota Seats to Higher Academic Course Bill, 2023 ba la wanrah da u MLA ka North Shillong Constituency u Bah Adelbert Nongrum hynrei kaba la shah rem khlem ïoh tang ban ïatai namar ka jingduna ki dkhot ka assembly kiba kyrshan ïa kane ka Bill kaba ïadei bad bhah leit pule sha ki jingpule kiba kham shalor kum ha ki laiñ doktor, enjiniar bad kiwei de.
Haba u Maphor u la ïoh ban ïakren bad u Bah Robertjune Kharjahrin u President ka HYC u la ong ba ha ka jingshisha kane ka Bill kaba u bah Adelbert u la wanrah ka dei kaba biang bha bad kaba dei ruh ban shim nongmuna ha ka jingpyntreikam ïa ka Reservation policy namar kam don kano kano ka jingïaphiah jaidbynriew hapdeng ki Garo bad Khasi hynrei kat kiba pas bha ha ki jingpule klas 12 kin ïoh ban leit pule na ka quota jong ka jylla.
“Lada phi peit ka Reservation Policy ka dei kaba long communal namar la bhah ïa ka jingleit pule la bud na ka Job Reservation Policy ka dei beit na ka bhah jinglong Khasi ne Garo. Kane ka Bill kaba wanrah u Bah Adelbert ka dei kaba la bhah kyllum beit 86 percent kan dei ïa ki riewlum ka jylla ha kaba kat kiba kham wan shakhmat kin ïoh leit pule na kane ka qouta ka sorkar jylla,” u la ong.
U la ong ba lada peit hi ha ki jingpule doktor ruh ba ki samla pule Khasi kiba hap ha ka Waiting List ki kham heh ka jingïoh mark ha ka NEET ban ïa kiba wan ha ka First List na ka liang ki Garo.
“Ngi ïohi ba ka sorkar ka ong beit ba lada pynkylla ïa ka Reservation Policy kan wanrah ïa kano kano ka jingja bym sngewtynnd namar kan ktah ïa ki Khasi bad Garo hynrei kane ka Bill u Bah Adelbert kan ym ktah ïa kano kano ka jaidynriew hynrei kat kiba kham pas bha kin ïoh leit pule lada dei Khasi ne Garo,” u la ong.
U la ong ba wat la na ka liang ka seng kam mynjur 100 na ka 100 namar ki don ki mat kiba donkam ban pynbeit hynrei na ka liang ka seng ka ai khublei ïa ka sienjam kaba u Bah Adelbert u la wanrah.
“Kino kino ki aiñ kim ju biang 100 na ka 100 hynrei lah ban pynkylla bad kita ki mat kiba ngim mynjur kiba don ha ka Bill ngin ai jingmut ïa u ban pynbeit,” u la ong.
U la ïathuh ba ki mat kiba ka HYC kam mynjur ka dei halor ka kyndon kaba kdew ba ki riewlum trai muluk kin ïoh leit pule na kane ka bhah ba 86% namar u ong kam shai ka jingbatai ïa kita ki trai jylla hynrei u ng ba ka HYC ka kwah ba kin kdew beit ba ki Khasi bad Garo kin dei kita ki riewlum trai muluk kiban ïoh jungmyntoi na kane ka bhah. Shuh shuh u la ïathuh ba sa kawei ka dei halor ka bhah kaba 10% kaba u la tyrwa na bynta ki briew kiba hap ha ki longïing ba duk katkum ka 103rd Amendment jong ka Constitution namar ha kane ka Amendment la kdew ba tang kito kiba wan na kano kano ka kynhun kaba ym pat ïoh ki bhah kyrpang kiba lah ban ïoh jingmyntoi na kane ka bhah.
“Dei ban buh bhah ïa kiba duk ym pat katkum ka 103rd Amendment jong ka Constitution hynrei ban bhah bet ïa iba duk wat lada dei kiba la ïoh bhah na ka jinglong riewlum ruh,” u la ong.
Shuh shuh u la ong ba kane ka Bill kan ïarap ban pynneh ïa ka bhah kyrpang ha ka jingleit pule namar kumba long mynta ym pat don kino kino ki policy ne ki aiñ ha kaba ïadei bad kane hynrei la shu bud beit na ka Job Reservation Ploicy kaba lada don kino kino kiban leit ujor sha Kashari kane ka rukom aibhah ha ka pule puthi kan shah pyndam marmar.
“Kumba u Bah Adelbert u la ong ba u wanrah ma u ïa ka Repealing Act ïa ka aiñ khalai la shah kyntai hynrei hadien ka sorkar ka wanrah hi ha kane ka kynti kaba mynta bad ngi kyrmen ba ka jingkyntait ïa kane ka bill kan jia kumjuh kumba jia ïa ka Bill pyndam aiñ khalai kumba u la kren,” u la ong.
Shuh shuh u la ong ba na ka liang ka HYC kan leit ban duddien ïa kane a mat bad ka sorkar ïoh lehse ka jingbym pdiang kan dei na ka daw ba ka tieng ïa ka jingmyntoi saiñ pyrthei ka VPP.
“Ngi te ngim khuslai mano ban myntoi saiñ pyrthei lada wanrah ka VPP ne ka sorkar ngin kyrshan beit namar kan dei ka jingmyntoi hi ïa ka jylla bad ki samla pule ba ngin leit ai jingmut sha ka sorkar ïa kane ka aiñrew ryngkat ki jingpynkylla ha ki katto katne ki bynta,” u la ong.