Nongpoh, Rymphang 29: Ka ophis jong ka District Tuberculosis Officer, Ri Bhoi District mynta ka sngi ka la sam da ki marbam bad ki jngbam tei met hapoh ka Pradhan Mantri TB Mukt- Bharat Abhiyan sha ki 36 ngut ki nongpang TB naka thaiñ Byrnihat kiba dang don hapdeng ka jingshah sumar ba la noh synñiang da ki 3 tylli ki kharkhana bala tip kyrteng kum ka Shyam Ferrous Century Pvt Ltd, ka Maithan Alloy Pvt Ltd, ka Pioner Carbide Pvt Ltd lem bad u Bah Sosthenes Sohtun MLA ka Jirang bad kane ka jingkyrshan marbam ïa ki nongpang TB kan long na ka bynta 6 bnai kum ki Nakshay Mitra bad ïa katei ka jingïalang la pynlong ha Byrnihat PHC.
Ka District TB Officer, Ri-Bhoi ka Dr. E. Kalwing haba kren ha kane ka jingïalang ka la ïathuh shaphang ki sienjam jong ka Sorkar India halor ka Pradhan Mantri TB Mukt Bharat Abhiyan, ka skhim ba thymmai kaba ai jingïarap marbam sha ki nongpang TB kiba dang don hapdeng ka jingshah sumar lyngba ka jingkyrshan jong ki riewshimet bad ki kynhun bapher bapher bad kumba long mynta ki don haduh 447 ngut ki nongpang TB ha Ri-Bhoi bad 174 ngut ki dei kiba ïoh jingïarap bad kiba sah ki dei ki bym pat ïoh jingïarap.
Kala ong ruh ba haduh mynta ki don kumba 21 ngut ki nongpang TB kiba la khlad noh na kane ka sla pyrthei, bad ka sorkar mynta ka dang buh thong ban rat diengkhong ïa katei ka jingpang bad ban pynjait syndon bad ban dang ïoh shuh shuh ki jingïarap naki kynhun bapher bapher.
Ha katei ka sngi la sakhi ruh da ka jingdonlang u Bah Sosthenes Sohtun MLA ka Jirang ka Dr TS Momin DMHO, ka Dr E Kalwing District Tuberculosis Officer lem bad ki nongmihkhmat nakitei ki karkhana, ki samla pule BSw jong ka Women’s College Shillong bad kiwei kiwei ki ophisar naka tnad ka koit ka khiah.
U Bah Sosthenes Sohtun MLA ka Jirang haba kren ha katei ka sngi u la ai ka jingïaroh ïaka sorkar kaba la buhthong ban rat diengkhong ïa katei ka jingpang lyngba ka Pradhan Mantri TB Mukt- Bharat Abhiyan ba kino kino ki kynhun lane ki riew shimet ki lah ban ïarap ïakitei ki nongpang kiba bun napdeng jong ki ki dei kiba wan naka longiing ba duk ba rangli bad shem jingeh shisha ban ïoh ïaka bam ka dih kaba biang bad kaba thikna namar kum ki nongpang kiba dang don hapdeng ka jingshah sumar ki donkam ïaka bam ka dih kaba biang ban ïoh koit kloi na katei ka jingpang nalor ka jingdih dawai.
