Kyrpad u Himanta ïa u Conrad ban phah tohkit bniah ïa ka jingïap aksiden ka samla ha Ri Bhoi

Nongpoh, Jylliew 07: U Myntri Rangbah ka jylla Assam, u Himanta Biswa Sarma u la kyrpad na u Myntri Rangbah ka jylla Meghalaya u Conrad K. Sangma ba un shim khia lem bad phah tohkit bniah halor ka jingïap ka samla ba dang 25 snem na Assam ha ka jingjia ïatyngkhuh Kali kaba la jia ha ka Shnong Shangbangla ba hap ha ka surokbah National Highway-6 ha Ri Bhoi District.
Kum ban pynkynmaw, kane ka jingjia ïatyngkhuh kali ka la jia ha ka step jong ka 4 tarik u Jylliew 2025 ha ka por 4.44 baje mynstep, ha kaba ka kali Hyundai kaba don ïa u number AS 01-EV-9578 katba ka dang wan na Shillong ban hiar sha Guwhati ka la leit ban tynrah ïa kawei ka Trok ba ieng harud surok ha ka jingpyrshang ban knieh ïaid shakhmat ïa kawei ka Kali bad na kane ka jingjia, ha kaba na kane ka jingjia ka la wan jia ka jingjia ba sngewsih ïa kawei ka samla ba la tip kyrteng kum ka Namrita Borah, 25 snem na Assam kaba la duh noh ïa la ka jingim
Katkum ka khubor ba la ioh lum na ki Pulit ka Ri Bhoi, la ïathuh ruh ba ïa katei ka Kali Hyundai la niah da u MD Ismail Hoque Choudhury, 33 snem ka rta na Haripur, Darang District, Assam bad kiwei kiba don lang ki kynthup ïa u Anyatul Watus, 39 snem ka rta na Guwahati, ka Gayatri Borah, 25 snem ka rta na Mangaldai, Assam, ka Pragya Dihingia, 29 snem ka rta na Sonari, Choraidu, Assam, bad u Meriganka Borah, 26 snem ka rta na Golaghat, Assam.
La ong ruh halor kane ka jingjia, ïa katei ka samla la wan rah da kawei ka Kali sha Civil Hospital Nongpoh ba ki Doctor ki la pynbna ba ka la dep khlad lypa na ka jingmynsaw ha ki bynta jong ka khlieh. La ong ruh ba ha katei ka jingjia, utei u dribar bad kiwe ki la phet na katei ka jaka ban rah lang bad ka kali sha Guwahati bad ïa katei ka samla pat la ïarap tang u da paralok ba don lang ban wan rah sha Civil Hospital Nongpoh.
Halor kane ka jingjia, hadien ka jingud jingnam na kiba haïing katei ka samla ba la khlad noh bad ruh ki bun ki paidbah na Assam, u Himanta Biswa Sarma kum u Myntri Rangbah ka jylla Assam, mynta ka sngi lyngba ka rynsan social media ha ka X, u la kyrpad syndon na u Myntri Rangbah ka jylla Meghalaya, u Conrad K. Sangma ban phah tohkit bniah halor kane ka jingjia bad ruh ban buh da ki heh ophisar ban tohkit bniah khlem da leh shiliang bad ruh ban paw lut ki jingshisha halor kane ka jingjia ba sngewsih ïa katei ka samla na Assam.