Kyrpad u Conrad ban pynïar ïa ki jingpyntreikam ïa ka PM Kisan sha ki nongrep shnong bad kur

Shillong, Naitung 16 : Haba batai ïa ka jingpher ka rukom bat khyndew hapoh ka Jylla, u Myntri Rangbah ka Jylla Conrad K Sangma, ula kyrpad ïa ka Sorkar Pdeng ban pynïar lem ïa ki jingpyntreikam jong ka PM KISAN sha ki Nongrep “kiba ïarep da ka shnong ne ka Kur’ hapoh ka Jylla.
U Myntri Rangbah ula ïakynduh ïa u Myntri ka Sorkar Pdeng ba khmih ïa ka kam rep Shivraj Singh Chauhan ha ka sngi Ba-ar ha New Delhi, ban batai bniah ïa ka jingpher ka aiñ bat khyndew ha Meghalaya kaba hap hapoh ka Sixth Schedule jong ka Riti Synshar ka Ri.
Ula ong, namar kane ka jinglong pher ka rukom ïabat khyndew, ka Jylla Meghalaya ka don ïa ki trai jaka kiba dei da ka Shnong ne ki Kur. “Ha ka jaka shnong, ïa ki jaka la ju aiwai sha ki nongshong shnong ba kin rep kin riang” ula ong.
U pyntip ba ha ki jaka kur pat, ki nongrep kila ïoh ka lad ban rep ha ki katto katne ki bynta jong ka jaka da ka jingbit jong ki nongïalam. “Ha baroh kine ki arjait ki jaka rep, kam shym la don satia kano kano ka kot ka sla halor ka jinglong trai ba shimet ïa ki jaka” ban jur u CM.
Ula ban jur ba namar ka jingbym don ïa ki kot ki sla ne ki dulir, kiba bun na kine ki nongrep kim shym la ïoh satia ïa ki jingmyntoi kaba ki nongrep ki ïoh na ka PM KISAN scheme.
U Conrad ula pyntip ruh ïa u Myntri ka Sorkar Pdeng ba ula dep ïakren teng ïa kane ka kam bad ka Ministry ha ki snem bala leit noh.
Haba ai nuksa ïa ka Manipur, ha kaba ka Sorkar Pdeng kala pynjynsur ïa ki kyndon na ka bynta ki nongrep kat kum ka para 3.5.1 jong ka PM KISAN scheme, u Conrad ula kyrpad ïa u Chauhan ban ai lem ïa kajuh ka jingpynjynsur ïa ki paid nongrep ka Meghalaya.