Kyrpad ki nongtih maw bad shyiap, ki trai kali, trai par maw ban pynthymmai ïa ka aiñ Triple MCR
Shillong, Nailar 23: Ki nongïalam jong ka Local Trucks and Owner Association ryngkat ka jingsynran lang jong u MLA ka Mawkynrew Constituency u Bah Banteidor Lyngdoh ha ka 22 tarik Nailar, 2024 ki la leit ban ïakynduh markhmat ïa u Myntri Rangbah ka jylla u Conrad Kongkal Sangma ban pynsngew halor ka jingeh ha kaba ïadei bad ka jingpyntreikam jong ka Tnad Forest ïa ka Meghalaya Mineral (Protection of illegal Mining Transportation and Storage) Rule 2022 bad ïa ka Meghalaya Minor Minerals Concession Rules 2016 (Triple MCR).
Na ka liang jong ka Association ka la pynsngew hakhmat u Myntri Rangbah ba ka Sorkar ka dei ban kham pynjem ïa ki kyndon namarba bun na ki briew kiba im kamai jakpoh na ka kam tih maw bad shyiap ki dei ki bym kotbor satia ban bud ïa kane ka aiñ. Ha kaba ïadei bad kane u Myntri Rangbah u la kular ban phah bishar ïa kine ki Rule khnang ba yn dup lah ban pynbeit ïa kine ki jingeh.
U Nongïalam ka Local Truck and Owners Association u Bah Ejenstar Kurkalang haba kren sha ki lad pathai khubor u la ong ba la seng ka la mynjur bad ka sorkar ha kaba ïadei bad ka jingtih maw tih shyiap ba kam dei satia ban ktah ïa ka mei mariang hynrei ha kajuh ka por pat ka la kyrpad ïa ka sorkar ba kan pyrkhat lem ïa ki longïing kiba duk kiba im jakpoh da kaba bylla bad trei ïa kane ka kam.
U la ong ba ka seng ka dei ban pyrkhat lang ïa kito kiba duk kiba don ki jingtrei kiba rit ki bym lah ban leh ïa kata ka mining lease bad ka quarry permit namar ka bun ka jinglut, ki bun ki jnit ki jnat kiba hap ban pyndep kiba ym lah satia ban kotbor khamtam ki paid nongkyndong kiba dang duna ha ka pule puthi kumta ka seng ka kyrpad pat ïa ka sorkar ba kadei ban pyrkhat lem ïa kum kine ha kaba ïadei bad ka kam tih maw tih shyiap bad ka transportation challan.
U la ong ruh ba ka seng ka kyrpad ïa ka sorkar ba kan kynthup lang ïa kine ki longïing kiba duk ki bym kotbor hapoh ka rule 3 ne ka exception rules ban pynlait ïa kito ki nongtrei kiba trei lyngba ka bor met ki bym pyndonkam ïa ki tiar ka juk mynta kum ka JCB bad u la ong ba halor kane u Myntri Rangbah u la kular ban kynthup ïa kane ka rule 3 kaba hapoh ka Triple MCR khnang ba kin lah ban trei kumba ki ju leh hynrei tangba kim dei ban pyntuid ïa ka khyndew sha ki wahrit ne wah heh kiba long ka daw jong ka jingpynduh ïa ki tyllong um, ka mariang bad ki jingpynsahnam ba la buh da ki mynbarim bad kumta ter ter.
Ha kawei pat ka liang ka Meghalaya Commercial Truck Owner and Driver Association lyngba u President Bah M Marngar bad u Bah D Pyngrope Secretary JAC Stone Crushers Owners Association, Quarry Owners & Workers Association haba kren sha ki lad pathai khubor ki la pyntip ba kin ïaibteng ban pynlong ki jingïakhih kumba la pynbna ha ka 19 tarik u Nailar ha ka jingïalang kaba la long ha madan Kynton-U-Mon katba ka sorkar kam pat pynkylla ne Ammendment ïa ka Meghalaya Mining Minerals Concession Rules, 2016.
U Bah Marngar u la ong ba ki la don ka jingïatreilang bad u nongïalam jong Local Trucks and Owner Association u Bah Egenstar Kurkalang bad la don ruh ka jingïalang ha ryngkat bad ki nongtrei bylla bad ka la don ka jingïalang sha Umphyrnai bad la ïalong tylli kawei, hynrei kum ki trai kali pat hap sngap ruh ïa ki trai par maw namar kine kidei kiba tip bha ïa ka kam bad ka jingdawa jong ki jong u Bah Egenstar ka long ban pynthymmai noh ïa ka Triple MCR Act namar lada ka long beaiñ sha ki nongtih maw kan long beaiñ ruh sha ki nongkit ïa ki maw ki shyiap bad kat bym pat ïohi ïa ka muhor jong ka sorkar ba ka la pynlong aiñ ban kit ne tih maw kan ym pat long kaba bha ban trei ïa ka kam, kumta ïa mynta baroh ki trai kali bad ka Meghalaya Commercial Truck Owners and Driver Association yn sangeh shwa ban kit ïa u maw u shyiap tat haduh ba ki trai jaka ne trai par maw par shyiap ki la leit ban kynduh ïa ka sorkar bad ba ka sorkar ka la pynthikna ban pynthymmai noh ïa ka Triple MCR Act hangta yn sa ïakren lang.