Nongstoiñ, Nailar 23: Ki nongri ñiang ryndia jong ka thaiñ Kyllonmathei West Khasi Hills, ki la shu shri ïam bad jaw ummat namar ka jingshah pynjulor lut ki jingthung kiba ju bam ïa ki ñiangryndia ha ka thaiñ.
Kane ka jingpynjulor ka la jia ha ka shnong Kyllonmathei, Shallang, West Khasi Hills bad la pyntip ba ïa kine ki jingthung la pynjulor da ki kynja khñiang ki bym lah satia ban ithuh ne tip kyrteng.
Ki nongri ñiangryndia ka thaiñ haba ïakren bad ki lad pathai khubor, ki la pyntip ba kine ki khñiang ki la bam duh lut ploiñ ïa ki sla jong u dieng ba ju ai bam u ñiangryndia, ba ki da rep kyrpang ban pynroi ïa kam pynmih ksai ryndia.
Ki la pyntip ba kane ka jingshah pynjulor kine ki jingthung ha kine ki khñiang kynsha, ka dei kaba dang shu jia mynta dang katno bad ïathuh ruh ba kine ki khñiang ki la bam lut ploiñ ruh wat ïa ki sla jong u phan dieng.
Nalor kata, ki la pyntip ba kane ka jingwan lynshop kine ki khñiang ka la jia ym tang ha kawei ne ar tylli ki lyngkha, hynrei ka la jia ha manla ki jaka rep kiba don marjan.
Kine ki nongrep ki la kyntu ïa ki bor ka Sorkar khamtam eh sha ka tnad ba dei khmih ba kan wan khmih bad kner lem ïa ki lad jingïarap.
