Shillong, Lber 11: Ka sorkar jylla ka la kyrpad ïa ka sorkar pdeng ban kyntiew ïa ka start-up fund na ka bynta ki self help group (SHG) kaba hab ha Deendayal Antyodaya Yojana – National Urban Livelihood Mission (DAY-NULM).
Haba ïathuh ïa kane ha dorbar mang tyngka ha kane ka sngi u Myntri Rangbah ka jylla u Conrad K Sangma u la ong, “Ngi la thoh sha ka sorkar pdeng bad ngi khmih lynti ba ka kan don ka jingkyntiew ïa ka pisa kaba la mang.”
“Ngi la ïoh ka jingtip kaba la wan na ka sorkar pdeng ba ka la kyntiew ïa ka pisa na ka T. 10,000 sha ka T. 25,000,” ong u Myntri Rangbah ka jylla.
Na ka liang jong u Myntri Rangbah u la pynthikna haba ïadei bad ki jingtip kiba bniah halor DAY-NULM kaba ïasoh lang bad ki skhim jong ka sorkar jylla ban pynthikna ba kiba bun ki skhim la ai lyngba ki SHG.
U Myntri Rangbah u la pyntip ruh ba ka sorkar ka la lah ban thaw da ki hajar ki Lakhpati Didi ha kine ki 6-7 snem ba la leit sha ki thaiñ nongkyndong. Kane ka la urlong ruh ba ka jingthaw ïa ki SHG ka kham suk sha ki thaiñ nongkyndong.
“Hynrei ïa kane pat ngim shym la lah ban bteng ha ki thaiñ sor naba ka long kaba eh ban wanrah lang ïa ki nongshong shnong ban ïatreilang,” ong u Sangma da kaba pynthikna ruh ban sa shim ïa ki sienjam ban kyntiew ïa ka jingdon ki SHG ha ki bynta jong ka sor.
Kham ha shwa ha ka jingjubab, na ka liang u Symud Myntri Rangbah uba khmih ïa ka tnat Sor u Bah Sniawbhalang Dhar u la pyntip ba naduh ka snem 2014, ki la don haduh 510 ki SGH ha ki jaka sor jong ka Meghalaya kiba hab hapoh ka Deendayal Antyodaya Yojana – National Urban Liveihood Mission (DAY-NULM). Na kine ki la don haduh 41 SHG ki bym treikam.
La ong ba ka pisa kumba T. 10,000 la dep ban ai kum ka start-up fund ha ka kyrteng ka Revolving Fund per SHG kaba dang hab hapoh DAY-NULM.
