Dei ban sdang noh ïa ki jaka pule Science Commerce na ka bynta ka jingmyntoi ki samla

Shillong, Lber 11: U Myntri Rangbah ka jylla u Conrad K Sangma ha ka sngi baar ba ka academic session jong ki artylli ki Science and Commerce College ha Mawphlang bad Mahendraganj ka la dei ban sdang khnang ba ki samla pule kin ym ïoh ïa ka hok jong ki.
“Ngi la sngewthuh ba ka jingpyndep ïa ka jingtei ka la shim por hynrei ngi ngeit ba ka jingsdang ïa ka academic session jong ki artylli ki college ka la dei ban sdang khnang ba ki samla pule kin ym duh ïa kane ka hok jong ki. La ka dei ban don ïa ka jaka kaba donkam ngin hap ban sdang ïa ki course,” ong u Sangma ha ka ki kynta jong ka jingkylli hapoh Ïingdorbar Thaw aiñ.
U la pynthikna ruh ba ki contractor kin pyndep ïa kane ka jingtei ha ka por kaba biang.
Kham ha shwa haba wanrah ïa ka jinglong jingman jong ka Science and Commerce College Mawphlang, na ka liang jong u Myntri ka tnat pule puthi u Rakkam A Sangma u la pyntip ba baroh ki kam jingtei ki la dep kumba 86 percent bad ka pisa ka la long 94%. Ka jingbuh ban pyndep ïa kane ka kam kan long ha u Lber 2025.
U la ong ruh ba ka sorkar ka la mynjur ban thaw ïa ki 46 tylli ki post ha kaba ki rukom treikam, ka jingmang ha kaba ïadei bad ka bording, ka jingsam ïa ka umbam umdih, ka jingsiang rong bad kiwei kiwei ki kam ki la nang ïaid shaphrang.
Ha kaba ïadei pat bad ka Science and Commerce College ha Bahsapara Mahendraganj, u Myntri u la ong ba baroh ki kam jingtei ki la ïaid kumba 66% bad ka jingsiew ka pisa ka la long 70%. Ka jingpyndep ïa ka kam jong kane ka project ka dei ha ka 31 tarik u Lber, 2026.
Shuh shuh na ka liang jong u Myntri u la pyntip ba ka pisa baroh ba la mang da ka sorkar pdeng na ka bynta kane ka project – science and commerce college Mawphlang ka dei T. 36.55 klur kaba dei ha ka 30 tarik u bnai jylliew, 2017 da kaba ai mang lang kaba long 90:10, ha kaba na kane ka pisa la pynlait T. 31.1685 klur.