La nang kiew ki kam khaïi drok ha ki thaiñ jong ka West Garo Hills, ïathuh u Bah Paul

Shillong, Lber 11: Ka jingkynrei jong ka jingkhaïi drok ka la nang kiew ha ki bynta jong ka jaka ri thor kaba don ha ka thaiñ jong ka West Garo Hills.
Ïa kane la pyntip da u Myntri ka tnad Social Welfare u Bah Paul Lyngdoh ha ka jingwanrah ïa ka jubab hapoh ka ïing dorbar thaw aiñ ka jylla ha ka sngi Baar.
U Bah Paul Lyngdoh ula ong kiba ngop drok ka la jur bha hapdeng jong ki khynnah samla ka West Garo Hills District bad kumta ki nongkhaiï bad nongdie drok kila jur bha ha ki jaka ri thor bad kito kiba marjan bad ka ri (Bangladesh) ruh kala jur bha namar ba kane ka thaiñ kadei ka thaiñ kaba ïajan bha bad ka jylla Assam and West Bengal lyngba ka Wah Brahmaputra bad ka jingjan bad ka ri Bangladesh.
U la ong, ba naduh u bnai Kyllalyngkot haduh mynta, la lap ïa kawei ka jingjia bad ka jingpyndonkam drok bad la rejistar case ha ki jaka ri thor jong ka West Garo Hills district ha Tillapara Bongarpar, Tikrikilla bad ïa kane ka case la rejistar ha Tikrikilla Police Station hapoh ki kyndon jong ka NDPS Act, 1985.
U Myntri ula ïathuh shuh shuh ba la thaw ïa ka Anti Narcotic Task Force (ANTF) ha ka District ban ïakhun pyrshah ïa ka jingkhaiï drok bad kiwei kiwei ki jingjia kiba ïadei bad ka NDPS hapoh ka District.
U la ïathuh ba ka la don ka Addiction Treatment Facility ha Tura Civil Hospital na ka bynta kito kiba la shah ktah na ka jingdih drok. Ïa kane ka jaka ai jingsumar la kyrshan da ka Ministry of Social Justice and Empowerment jong ka Sorkar India.