Ngi la shim bun ki lad bad sienjam ban pynduna ka jingshah ktah ha ka jingshlei um: Conrad

Shillong, Lber 11: U Myntri Rangbah ka jylla u Conrad K Sangma ha ka sngi baar u la ong ba ka jylla ka la shim bun ki lad ki lynti ban pynduna ïa ka jingshah ktah na ka jingshlei um na ka jingjur pat jong u slap ha ka jylla.
Katkum ka jingong jong u, ka sorkar ka dang trei borbah ban khmih ruh ïa ka jinglong jingman jong ka mariang da kaba wanrah lang ïa ki technology kiba thymmai ban ïathuh bniah ïa ki jingshlei um kiba la ktah ïa ka jylla ha ki por ba la dep.
Ka jubab bynrap jong u ha ka kynta jingkylli u Sangma u la ong, “Ngi la shim bun ki sienjam la ka long ha kano kano ka rukom la ka dei lyngba ka tnat water resource ne ka tnat soil and conservation ne ka tnat ki kam khlaw, ngi la shim bun ki lad, hynrei ïa ka jinglong jong ka mariang pat ngim lah ban batai lypa.”
“Kham bun ki kam ngi la pyrshang ban khmih ïa ka jinglong ka suiñbneng kaba kynthup ruh lyngba ki technology satellite imagery kiba thymmai bad kiwei kiwei khnang ba ngin lah ban ïoh ki jingtip kiba khamkloi ha kaba ïadei bad ka jingwan ka jinghap slap kaba jur bad ban lait na ki jingshlei um. Haoid ngi la shim ïa ki sienjam ban ïada na ka jingshah ktah ka jingshlei um kaba la ju wanrah ïa ka jingeh ïa ka jylla Meghalaya,” u la bynrap.
Shuh shuh u Myntri Rangbah u la pyntip ba ka Disaster Response Fund ka sorkar ka la buh T. 322 klur bad ka Disaster Mitigation Fund ka la long T. 81 klur ha kine ki san snem ba la leit.
“Tang ha kane ka shi snem ba la leit ka sorkar ka la pynlut T. 71 klur bad T. 322 klur ha ka DRF na ka bynta ki jaka kiba shah ktah na ki jingshlei um.”
Haba ong ba ka pisa la dep ruh ban sam sha ki district u Sangma u la ong, “Ngi la pynkylla ïa ki kyndon bad mynta ngi la shah ïa ki DC ban sam ïa ki tin sop ïing na ka bynta kito ki longïing kiba shah ktah ha ka jingshlei um bad ïa kane ka jingïarap pisa la sam sha ki DC. Ïa kane la leh ruh hadien ba la ïohi ïa ka jingjubab na ki paidbah kiba donkam ïa kane ka jingïarap kaba kyrkieh na ka bynta ba kin shna ïa ki ïing ki sem jong ki kiba la shah pynjulor.”
“Na ka general relief (GR) ba ka pisa kaba la ai sha ki DC, ngi la buh ruh ka pisa bynrap kaba la long T. 25 lak ha kaba ki DC ki lah ban ai ka jingïarap khlem da ïoh ka jingmynjur na ka sorkar ne ka tnat bad ki DC ki lah ban ai ïa kine ki tin sop ïing sha ki longïing kiba shah ktah na ka jingshlei um ha kaba kane ka long ka jingïarap kaba khraw,” u la ong.
Kham ha shwa ha ka jubab jong u Myntri ka tnat Revenue & Disaster Management u Bah Kyrmen Shylla u la pyntip ba ki la don haduh 28 tylli ki longïing kiba la shah ktah ha Dadenggre block ha u snem ba la dep na ka daw jong ka jingshlei um bad na ka liang ka tnat ka la shim bun ki sienjam ban ïarap ïa kine ki longïing.