Shillong, Lber 18: Ka seng Hynñiewtrep Achik National Movement (HANM) ha ka sngi baar ka la kyrpad ïa ka Sorkar jylla ba kan thung ïa ki doktor Specialist ha ki District Hospital kaba don ha West Khasi Hills District.
Ia kane ka la pynpaw lyngba ka shithi ba ka la phah sha ka Myntri ka tnat ka koit ka khiah ka Kong Ampareen Lyngdoh, u President ka HANM West Khasi Hills u Bah Gabriel Sohlang u la ong, “Ngi kyntu ïa phi ba shimkhia ïa kane ka jingkyrpad kum ka kam kaba hakhmat eh bad ban shim ïa ki sienjam kiba donkam ban pynkhlaiñ ïa ki lad jingsumar hapoh West Khasi Hills District”.
U Bah Gabriel u la ong ba ka District Hospital ka donkam ïa ki doktor Specialist kiba kynthup ïa u Orthopedic Surgeon- ban weng ïa ka jingkiew jong ki jingpang ba ïadei bad ki jingmynsaw bad ki jingpang ba ïadei bad ki shyieng, Doctor Radiologist- ban pynthikna ïa ka jingshakri kaba biang ban ïoh ïa ka eksamin ba paka, Oncologist-ban pynbiang ïa ki lad wad bad sumar ïa ka jingpang cancer, Biochemist-ban pynkhlaiñ ïa ka jingshakri ha ka laboratory bad ban wad bniah ïa ki jingpang, Psychiatrist- ban weng ïa ki jingeh kiba nang kiew ha ka koit ka khiah ka bor pyrkhat, Obstetrician & Gynaecologist-ban ai ka jingsumar kaba kham bha ïa ki longkmie bad ki khunlung bad u Doktor Paediatrician-ban pynbiang ïa ki jingdonkam ha ka koit ka khiah jong ki khyllung bad ki khynnah.
HA ka shithi ka HANM ka la pyntip ba kumba ka long mynta ka District Hospital West Khasi Hills ka don tang kawei ka Gynecologist bad kawei ka Paediatrician, kaba khlem lah ban shakri ïa ki nongpang ha baroh kawei ka district.
“Ka jingbym don jong kine ki Doctor kyrpang (Specialist) ka pynbor ïa kiba bun ki nongpang ban leit sha ki jaka ba jngai kum sha Shillong ne Guwahati, kaba wanrah ïa ka jingeh ha ka liang ka pisa tyngka bad ka bor met ïa ki,” la ong u Bah Gabriel bad u la bynrap, “Ba ka jingai mang tyngka (Sanction) ïa kine ki kam (Post) kan pynbha shibun ïa ka rukom sumar ïa kiba pang ha baroh kawei ha ka district bad kan ai ki lad jingsumar kiba kham bha sha ki nongshong shnong.”
