Shillong, Lber 18: Ka seng Federation of Khasi Jaiñtia and Garo People (FKJGP) ka la dawa ïa ka sorkar jylla ban wad ïa ki lad ki lynti ban pyllait noh ïa ka ram kaba la shim da ki nongrep, ka ban long ka jingïarap ban weng ïa ka jingeh ka jong ki kaba ki la mad ha kane ka sngi.
Ha ka shithi kaba la phah sha ka Myntri kaba khmih ïa ka rep ka riang ka Kong Ampareen Lyngdoh ha ka sngi Baar, u President ka FKJGP Mawkynrew circle u Shakanstar Mynsong ula ong ba ki nongrep ka Mawkynrew bad Mawryngkneng Block ki la mad ïa ka jingeh namar ka jingbym lah ban siew ïa ka ram namar ka jingkylla ka suiñbneng ha kaba ki jingthung jingtep ki la ïap lut namar ka jingduna slap bad kiwei pat ki jingeh.
“Kumta ngi kyntu ïa ka sorkar jylla ban wad ïa ki lad ki lynti ban pyllait noh ïa ka ram, ka ban ïarap ïa ka jingeh kaba mad da ki nongrep ha kine ki sngi,” ïathuh u nongïalam ka FKJGP.
Ka FKJGP ka la pynpaw ruh ba ka jingbym ïoh ïa ki sboh dawai bad ka jingpulom ka sorkar ban ai ïa ki symbai lyngba ka tnad bad ka jingslem ban pyllait ïa ka jingïarap sha ki Producer Group (PG) wat hadien ba ki la rejistar la palat ïa ka shi snem ka la ktah jur bha ïa ki nongrep ha ka jylla.
“Halor katei, ngi kyrpad ïa ka tnad ban shimkhia mardor ban pynbeit ïa kine ki jingeh,” la ong u Bah Mynsong.
Sa kawei pat ka mat kaba ka seng ka la pynpaw ka kynthup ïa ka jingdonkam ban sam ïa ki spray pump, ki symbai high yielding variety, ki jingai jingtip shaphang ki skhim bapher bapher ïa ki nongrep bad ban pynkloi ka jingai jingïarap pisa ïa ki nongrep kiba la shah ktah na ka jingpynjulor ka mei mariang nalor kiwei pat ki jingeh.
