Kyntu u Nongïalam HYC ban kiar na u drok, ka shongkha khynnah bad ka bam sap ban kiew ka Jaidbynriew

Nongpoh, Nohprah 18: Ha kawei na ka prokram ba la pynlong da ka Socio Economic and Education Life Development Committee (SEELDC) kaba dei ka Committee na hap ha ka jingpeit jingkhmih ka Umsong District hapoh ka KJP Sepngi kum shi bynta ban pynmih pisa na ka bynta ban tei ïa ka ophis jong ka District Umsong, u President ka HYC sengkmie, u Bah Roykupar Synrem nalor ba u la kular ban ïa kner lem ïa ki lad jingïarap ha kaba tei ïa katei ka ophis treikam ka Distric, u la ban khia ruh halor lai tylli ki bynta ba ngi dei ban kiar khnang ba ka dong bad ka thaiñ kan dang kiew shaphrang ha baroh ki liang.
Kane ka dei ka prokram ba kyrpang ba la pynlong da ka District Umsong ha ka sngi Saitjaiñ ha ka Shnong Umsong ha Ri Bhoi District ba ka District Umsong ka la trei borbah na ka bynta ban pynmih pisa ban pyndep noh ïa katei ka ophis kaba ki la mang ha ka jinglut kaba T. 50 lak.
Haba kren ha katei ka sngi kum u nongïalam ba rangbah ka HYC sengkmie, u Bah Roykupar Synrem u la ai ka jingïaroh ïa ka District Umsong kiba la don kata ka jingiohi jngai ban tei ïa katei ka ophis ba pura ha Umsong bad kane ka jingdon ka ophis kan long ka jingmyntoi ym tang ïa ka District, hynrei kan ai jingmyntoi ruh ha kiba bun ki bynta ba shisien ba la don ka ophis treikam ba pura kin ioh ban ïathir ne ïa mir jingmut ym tang ha ka kam ka jong u Blei bad kin ioh lad ruh ban pyrkhat ne ïa tai na kabynta ka bha jong ka imlang ka sahlang.
Ha katei ka sngi, nalor ba u la kular ban ïa kner ka kti ka diang ka kti kamon katkum ka jingkotbor ka seng ban ïa syniang na ka bynta ban pyndep ïa katei ka ophis ka District Umsong, u Bah Roykupar u la kren ruh halor lai tylli ki bynta ba kam dei ban rung ha ka imlang ka sahlang khnang ba ka jaid bynriew jongngi kan dang kiew shaphrang lada ngi lah ban kiar na kitei ki lai tylli ki nongshun ha kajingim jongngi hapoh ka imlang ka sahlang.
U la pynpaw ruh ba kitei ki lai tylli ki bynta kiba ngi hap ban kiar ka long ban nym ailad ba u drok un rung sha katei ka dong bad ka thaiñ khnang ba ki khun samla kin lait na kajingshah pynjot ha u drok, kaba ar ka long ban kiar na ka shongkha khynnah bad kaba lai ban kiar na ki kam bamsam.
“Lada ngi lah ban kiar tang na kitei ki 3 tylli ki jingshah ktah ha ka jaid bynriew kiba kynthup naduh u Drok, ka shongkha khynnah bad ka jingbam sap, kan wan ka jingkylla ha ka imlang ka sahlang bad kan kyntiew ïa ka ri bad ka jaid byrniew” ong u Bah Roykupar Synrem kum u nongïalam ka HYC Sengkmie.
Namarkata, u la ban khia ruh ba kum ki paradoh ki parasnam ki dei ban don lang ïa kata ka jingkitkhlieh na ka bynta ka imlang ka sahlang bad haba don lang kata ka jingkitkhlieh ne ka jingïatrei lang kan lah shisha ban kyntiew ïa ka ri bad ka jaid bynriew jongngi ha baroh ki liang, u la bynrap shuh shuh.