Ki don bun kiba khnium ïa ki tamasa har rukom kiba ngi ïohi ha kine ki sngi ïa kiba ka sorkar ka ai jingïarap. Ka sorkar ka kam ba kine ki jingleh rong leh tamasa ki wanrah shibun bah ki nongshangkai ri (tourist) na kylleng ka ri bad wat nabar ri ruh. Kaba ka ïarap ïa kito kiba trei ha ki kam ‘Tourism’ kum kito kiba don ïa ki jaka sah mar khapïing lajong ïa kiba ngi ong ki homestay kiba lah pur kylleng ka jylla mynta. Don bun bah ki longïing kiba ïoh kamai ja kpoh na ka jingwan ki nongjngohkai pyrthei. Sa kawei kaba ngi dei ban sngewthuh ruh ka long ba haba don kine ki jingleh kmen (festival) kiba har rukom kiba myntoi ki dei ki briew jongngi na kylleng ka jylla kiba wanrah ïa la ki jingdie jong ki.
Ha ki lai sngi ba la don ka prokram ki Khanatang ka Aiom Tlang (Winter Tales) ha Nan Polok ngi shem ia ki nongdie sohniamtra kiba wan naduh na Mawphu bad ki ïoh ïa ka dor kaba biang eh na ka bynta u soh jong ki namar ki nongrep ki die hi dalade sha ki nongthied. Ym dei ba ki thied pateng na ki nongkhaïi. Bun bah ki stad thaw dur bad dro dur (artists) ki la pyni ïa ka sap ka phong jong ki hakhmat ki nongwan jngoh kai kiba bun. Ki nong-oh dur har rukom na ki tnad dieng, kiba wan na Garo Hills ki ong ba kim ju ïoh lad satia ban leit pyni lem ïa ki jingshna jong ki shabar jylla. Lada dei ba kine kiba duriap ïa kane ka kam ki ïoh ïa la lad ban die ïa ki ha ki dukan hangne ha sor Shillong kan jin da la ïarap eh ïa ki.
Ki artist kiba pawnam kum U Rangbah Benedict Hynniewta, Raphael Warjri, Careen Langstieh bad bun kiwei pat kiba ngam lah kynmaw kyrteng ki la buh ïa ki jingdro jong ki ha kylleng ka Nan Polok ha kine ki lai sngi haduh 14-16 tarik u Nohprah. Ki don shibun bah ki samla kiba tbit ban shna ïa ki jingdih kiba har rukom kiba ka shna na ki kynja soh kiba mih na kane ka ri jongngi hi. Ki paidbah ki ïa ïohlad ban mad ïa kine ki jingdih har rukom. Ki paidbah ki ïoh lad ruh ban mad ïa ki kynja jingbam har rukom bad ban ïoh ïakynduh ïa kito kiba shet ïa kine ki jingbam, naduh ka ja ka doh, ka dohkha har rukom haduh ki jingbam phareng kiba la shet da ki samla kiba la ïoh ka jinghikai na shabar.
Shuh shuh ki nongtem kiba na Pynter kiba long ki nongtem ïa ki sur Khasi paka ki la pynjahthait ïa ngi ki nongsngap. Ym dei tang mangi kiba sngewthuh ktien kiba sngewtynnad ïa kine ki jingrwai hynrei wat kiba wan nabar jylla bad na nabar ri ruh ki da sngewhun shisha ban sngap ïa ki jingput jingtem kiba na kane ka ri.
Kawei kaba sngewtynnad eh shaphang kane ka prokram Ki Khanatang Ka Aiom Tlang ka long ba ki bun bah kiei kiei kiba pynbyrngia ïa ki hep barit jongngi. Mynsngi Saitjaiñ ka la don ka jingïathuh khana shaphang ka krem pubon ha Mawmluh kaba long ruh ka krem kaba ïohnam namar ba dei na ki mawshun hapoh ka krem ba la tip ïa ka snem jong kane ka pyrthei jong ngi kaba la don haduh 500 lak snem. Na kane ka jingïathuh khana ki heprit ki la lah ban tip kham bha shaphang kiei kiei kiba don hapoh kata ka krem bad kane hi kan pynpyrkhat ïa ki shaphang ka spah ka phew jong ka mei ramew jong kane ka jylla jongngi. Ki heprit ki ïoh lum jingtip ruh ba hapoh ka krem ki don ki dohkha bad ki shymprong kiba lieh bad kiba khlem khmat namar ba kim donkam ïa ki khmat hapoh krem ba ki im.
Ki don ki lymbit ruh kiba sah hapoh krem kiba mih shabar krem por mynsngi ban leit wad bam bad por janmiet pat ki wan her biang shapoh krem ban thiah da kaba sdien da khongpong halor ki maw. ïa ka Krem Mawmluh ki stad saians ki la lap ba ka dei kawei ka lad ban tip ïa ka snem jong ka pyrthei bad ki la ai kyrteng ïa kane ka Krem ka Meghalayan Age lane Ki Snem Jong Ka Pyrthei Katkum Ki Jinglap na ka Krem Pubon ha Mawmluh. Ka kot jingïathuhkana shaphang ka krem Mawmluh kaba la ai kyrteng, “Ka Krem Pubon Ba Phylla,” ïa kaba la thoh ha ka ktien phareng da U Rangbah Glenn Kharkongor U heh-duh ka skul bah Martin Luther Christian University (MLCU) bad pynkylla Khasi pat da manga. Kaba kham itynnad shuh shuh shaphang kane ka kot ka long ba ki don bun bah ki dur kiba la dro da I Kong Careen Langstieh iwei na ki artist ba pawnam jong ka jylla. Ki heprit ki la sngewtynnad eh haduh katta katta ban ïoh bat ïa kane ka kot bad ki kmie ki kpa ruh ki la pynthied ïa kane ka kot na ka bynta ki khun jong ki.
Don sa kawei ka kot kaba dei shaphang ki sim har rukom ha kane ka jylla Meghalaya kiba la thoh bad buh de bad ki dur ïa kaba la pyllait myn Sngi Saitjaiñ. ïa kane ka kot ruh bun bah kiba la sngew shoh mynsiem namar ki ïoh ban tip ïa ka kyrteng jong ki jait sim baroh.
Ym don da kawei pat ka tamasa tlang kaba da pyrkhat sani haduh katne na ka bynta ki khynnah rit. Bunsien la shu pynleit jingmut tang ha ka rwai ka siaw hynrei Ki Khanatang Ka Aiom Tlang ka pyrkhat ban pynsngewtynnad lem ïa baroh bad kiba wan hangto ki kmen ban ïoh wan ïalam ïa ki khun ki ksiew jong ki.
Nalor kata ki don ki jingbatai na ki nongshna khiew khyndew na ka shnong Nyrnai, na ri Jaintia kiba la wanrah ïa ki khiew jong ki bad ki da batai lem ruh ïa kiba kwah sngap, kumno ba ki shna ïa kine ki khiew ranei. Ngi ïoh shibun ki jinghikai na kane ka jingleh tamasa, ym tang ka put ka tem.
ïa kane ka prokram Ki Khanatang Ka Aiom Tlang la pynïaid da ka kynhun Da-Kti kaba la ïalam khmat da I Kong Rida Gatphoh lem bad ka kynhun jongi kiba la trei shitom kat lah kat ïai ban pynkmen ïangi ki paidbah. Don shibun ki tiar kiba nylla ïa kiba ngin ym lah ban ïoh na ki dukan hynrei kiba ngi ïoh ban thied na kane ka Tamasa Tlang.
Hooid ka don ka jingïarap na ka liang ka Meghalaya Age Ltd kaba dei ka kompeni ba pynïaid da ka sorkar jylla hynrei ka jingmut dur bad ring dur ïa kane ka prokram ka dei ka kam jong ka Da-Kti bad ngi dei ban sngewnguh ïa katei ka kynhun kaba la lah ban wanrah jingkmen na ka bynta ki khunlung, khynnah, ki samla, riew rangbah bad wat kiba la tymmen ruh.
Namarkata ban shu ïa woh dong ba kine ki jingleh tamasa kum ha kine ki por ki long kum ba pynbijai ei ïa ka pisa sorkar kim shnongnia da lei lei ruh. Ka shong ha ki nongpynïaid kumno ki lah ban pyrkhat da kaba ïar jingmut haba ki pynlong ïa kum kine ki prokram.
