Shillong, Nohprah 18 : U Chief Executive Member (KHADC) u Bah Pyniaid Sing Syiem mynta ka Lah Sngi U Blei ula aiti ïa ka Trok thymmai sha ka Dorbar Shnong Rynjah na ka bynta ban kit ïa ki niut ki nier.
Ha kane ka sngi la don lang ki MDC ba kynthup u Bah Fantin Lakadong, u Bah Latiplang Kharkongor, u Bah Bindo Lanong, u Syiem ka Hima Mylliem u Paiem Ainam Manik Syiem, u Rangbah Shnong, ki longkmie, ki nongshong ïew bad ki paid nongshong shnong.
ïa kane ka Trok thymmai la aiti sha ka Dorbar Shnong Rynjah na ka ban kit ïa ki niut na ka ïew Rynjah bad naka Shnong baroh kawei.
Haba kren ha kane ka sngi, u Bah Pyniaid ula ong, ba ïa kane ka jingsam kali kit niut sha man ki shnong ka dei naka bynta ban pynthikna ïa ka jingkhuid ka jingsuba ha man la ki dong bad ki shnong.
U Bah Pyniaid ula ong ba ka District Council ka don ïa ka thong ban wanrah ïa ka jingkhuid ka jingsuba ha man ki shnong bad dei namar kane ka la wanrah daka Solid Waste Management Bill bad ban pyntreikam da ki Resources Recovery Centre (RCC) ha man ki Shnong.
Ula ïathuh ba ïa ka Trok kit niut la mang lyngba ka Chief Ministers Special Development Fund (CMSDF) bad ïa ka kali la thied ha ka dor T.24 lak.
U Bah Pyniaid ula kyntu ïa ka Dorbar Shnong Rynjah ban wad jaka naka bynta ban buh da ka RCC na ka bynta ban pyllang ïa ki jaboh ba mih na ka ïew bad na ki longïing.
“Ka jingdon ki RCC kan aikam ïa ki trai Shnong namar lyngba ki RCC ki paidbah ki lah ban die ïa ki niut ba pyllang sha ki Company kiba pyndonkam ïa ki niut ba la pyllang” la ong u Bah Pyniaid.
Na ka liang u Syiem ka Hima Mylliem u Paiem Ainam Manik Syiem ula pynbna ban synniang da ka song pisa sha ka Dorbar Shnong.
Ha kane ka sngi ka Dorbar Shnong Rynjah kala ai khusnam ruh ïa ki nongtrei ASHA bad Aganwadi ban ai jingithuh ïa ka jingshakri jong ki ha ka imlang sahlang.
