Nongstoiñ, Ïaïong 9: Ka shnong Umshynrut kaba hap ha ka Mawshynrut C& RD Block ka dei ka shnong ka bym pat don satia ïa ka surok kaba biang na ka bynta ban pynsuk ïa ki paitbah ha ka leit ka wan bad ka kit ka bah. Katei ka shnong ka dei kaba jngai bha na surok bah bad ka surok kaba don mynta, ka dei kaba la pyntrei lyngba ka MNREGS na ka shnong Thiepjaphlang haduh Shilianrynñoaw, kaba pynïasoh bad ka surok MNREGS kaba la pyntrei da ka shnong Tlon haduh ban pynïasoh bad ka surok kaba la pyntrei da ka shnong Umshynrut.
U bah Broswell Tyrsa uwei na ki nongïalam jong ki samla jong ka shnong haba ïakren bad u nongthoh khubor, u la ong ba watla katei ka surok ba la shna lyngba ka skhim MNREGS ka la don ruh. Hynrei ynda la dei ka aïom slap ki kali kim long shuh ban ïaid. Man la u snem ynda la poi ha u bnai Naiwieng, ki paitbah jong kitei ki lai tylli ki shnong ki ju ïamih ban maramot namar ka la dei ruh ka aïom ba u sohñiamtra u la sdang ban ih.
U la ong ba haduh mynta ka shnong Umshynrut ka dei ka shnong kaba hakhmat duh ban pynmih soh ñiamtra hapoh West Khasi Hills. La jan kawei pa kawei ka longïing hapoh ka shnong ki dei kiba im ha ka rep sohñiamtra, soh jew, ki jhur bad kiwei kiwei. Ha katei ka thaiñ ym don ki jaka ba long ban shna pynthor kba, lait noh tang khyndiat eh ki jaka bad kiba bun ki nongshong shnong ki pyndonkam ban rep da u kba lum da kaba pom shyrti ïa ki khlaw.
U la ong ruh katkum ka jingïaid ka por katei ka shnong ka la donkam haduh katta katta ban don ïa ka surok kaba biang na ka bynta ban pynsuk ïa ka leit ka wan, ka kit ka bah khamtam ha ka por tlang namar ki paitbah kiba rep soh ki hap ban pynpoi sha man la ki ïew kum ha Riangdo Shahlang, Nongstoiñ bad kiwei kiwei. U la ong ruh ba lada ka la don ka surok kaba biang ki nongrep soh ki lah ban kamai ar ne lai shah ïa kaba ki kamai ha kine ki snem ba la dep.
