Mawkyrwat, Ïaïong, 09: Ka Seng Khasi Nonglang (SKN), South West Khasi Hills District, mynta ha ka Sngi U Blei ka 09 tarik u Ïaïong, 2023 ha ryngkat ka jing-i-phuh jing-i-phieng ka la ïoh ban pynkut noh ïa ka Shad Suk Mynsiem (SSM) ba la ju pynlong shi sien ha ka shi snem hapoh madan shad jong ka Seng Khasi Nonglang ha Nonglang, South West Khasi Hills District ha kaba ki nongshad ki la poi haduh 352 ngut ba kynthup ïa ki samla shynrang bad kynthei.
Kane ka shad ka kmen ka long kum ka jingkynmaw bad ka jingainguh u Khun-Khasi Khara kaba shisien shi snem ïa U Blei Trai Kynrad Nongbuh Nongthaw ban neh la ka hok la ka Riti ha kaba la pynphuh pynphieng da ka jingdonlang ki nongshad shynrang bad kynthei na kylleng ki jaka.
Lah ban kdew ba ïa kane ka Shad Suk Mynsiem jong ka Seng Khasi Nonglang la ïoh ban sdang naduh ka 8 tarik u Ïaïong, 2023 ha kaba u bah T. Kharlyngdoh, President jong ka Seng Khasi South West Khasi Hills District u la ïoh ban plie bad pynher ruh ïa ka lama jong ka seng. Ha ka sngi pynkut noh ïa kane ka Shad Suk Mynsiem mynta ka sngi ka 09 tarik Ïaïong, 2023 la ïoh ban pynhiar ïa ka lama jong ka seng da u bah O.S. Kharbuli, Executive Engineer jong ka MeECL, Shillong u ba long kum u kongsan.
U bah O.S. Kharbuli, Executive Engineer jong ka MePDCL, Shillong haba kren ha kane ka sngi ba pynkut, u la pynpaw ka jingnguh nyngkong ïa U Blei Trai Kynrad U ba bad ka mei ramew soh mei ramew syntiew kaba la pdiang hun ïa kane ka shad ka kmen ha ryngkat ka mei mariang ka syiem mariang kaba la pynphuh pynphieng bad ka mei ngi kaba la synriej da ki um ksiar ki um rupa ha kane ka shad ka kmen. “Kane ka dei ka shad ka kmen ka dei ba la ai ha ngi u khun bynriew naduh ki longshwa manshwa bad to ngin ai ka burom na ka bynta jong ki kiba ba la seng bad saiñ dur ïa kane ka shad ka kmen”, u la pynpaw. U la ong ruh ba kane ka shad ka kmen jong u khun khasi khara kaba long shi sien shi snem ka dei ka jingainguh ïa la U Kynrad bad ban kynmaw na ka por sha ka por.
Ha kane ka sngi shwa ban pynhiar ïa ka lama, u la ai ruh ki kyntien jingaikhublei na ka bynta ka Seng Khasi Nonglang kaba la ïoh ban pynlong ïa kane ka shad ka kmen khlem kino kino ki jingpynthut bad ka la long kaba ïaid beit ïaid ryntih. Ha kajuh ka por u la ai ruh ki kyntien jingkyrkhu kyrdoh na ka bynta baroh ki ‘rang bad ki ‘thei nongshad ba kin nangïai don hapdeng ki met kiba koit ba khiah ha ryngkat ka kamai kajih kaba dap kyrhai bad ba kin nangphuh nangphieng ha ki sngi ki ban dang wan ruh.
Ha kane ka sngi pynkut ïa ka Shad Suk Mynsiem la sakhi lang da ka jingdon ryngkat u bah Kynpham V. Kharlyngdoh, ki ‘riew rangbah, ki nongkitkam jong ka Seng Khasi Nonglang, ki longkpa, longkmie, ki hep kiba rit lem bad ki nongshad shynrang bad kynthei ba kynthup haduh 352 tam ha ryngkat ki riam kiba i-phuh i-phieng.
Ka Seng Khasi Nonglang shwa ban pynkut ka la ïoh ruh ban ai jingaisngewbha sha baroh ki nongshad shynrang, kynthei bad kumjuh ruh ki hep kiba rit.
