Shillong, Risaw, 24: Ka Meghalaya United Christian Forum (MUCF) ha ka sngi Baar ka la kyntu ïa ka Sorkar Meghalaya Democratic Alliance (MDA) ba la ïalam da ka National Peoples Party (NPP) ban burom ïa ka jingsngew jong ki lak ngut ki Khristan da kaba pynkynriah noh ïa ka tarik ban pynkut ïa ka tamasa Shillong Cherry Blossom kaba hap ha ka sngi u Blei, kata ha ka 19 tarik, Naiwieng, 2023.
Ha u kyrwoh, u Chairman jong ka MUCF u Rev. Batkupar Dunai u la ong ba ka Forum ka ngeit ba manla ka sngi ka dei ka sngi kaba u Blei u ai kyrpang, hynrei ka sngi u Blei ka dei ka sngi khuid ban mane Blei jong ki kynhun Balang bapher bapher lait noh ki katto katne ki jait naim kiba mane Blei ha kiwei pat ki sngi.
“Ha kaba ïadei bad ka tamasa Cherry Blossom kumba la ïohi ha ki lad pathai khubor ba yn sa pynkut ha ka sngi u Blei, ka MUCF kan pynpaw ïa ka mynsiem ai jingïaroh ïa ka Sorkar Meghalaya lada ka pynkynriah noh ïa ka sngi pynkut jong kane ka prokram sha kawei pat ki sngi da kaba burom lem ïa ka jingsngew jong ki Khristan ha Meghalaya kiba kheiñ kyntang ïa ka sngi u Blei ban pynlong ïa ki jingmane Blei, ka jingmane Blei jong ki Khristan kaba lait na ki jingshah pynthud ha kino kino ki kam sngewbha khamtam ha ki tamasa kiba heh,” la ong u Rev. Dunai.
Ïa ka tamasa Cherry Blossom la pynbna ban sdang ha ka 17 tarik, Naiwieng bad yn sa pynkut ha ka 19 tarik Naiwieng, kaba hap ha ka sngi u Blei.
Ha ka Lah Sngi u Blei, ka Khasi Jaiñtia Christian Leaders Forum (KJCLF) ka la pynpaw ba ka Forum kam pyrshah ïa ka tamasa ba la pynlong da ka Sorkar.
“Hynrei ka (Forum) ka kwah ban pynpaw ba ka sngi u Blei ka dei ka sngi khuid sngi kyntang jong ki Khristan bad ki Balang,” la ong u Secretary ka KJCLF u Rev Dr. E.H Kharkongor ha u kyrwoh.
U Rev. Kharkongor u la ong ba ka Forum ka kwah ban ïohi ba ka jingpynlong ïa ki tamasa da ka jingsuk bad ka jingïashim bynta lang jong ki paidbah bad kaba lait na kano kano ka jingshah pynthud lane ki jingpynwit khnang ban wanrah ïa ka shongsuk shongsaiñ ha ka jylla.
