Ka ‘Kong Barr’- ka nongwanrah jingkylla ba jar-jar kaba la khlad 50 snem mynshwa hynrei ki matti ki dang im

Shillong, Risaw 24 : Ha ki snem 1950 terter haduh u snem 1973, ha ka shnong Kharang jong ka thaiñ Mawkynrew la wan shong wan sah kawei ka briew kaba dei na Ri England kaba la kylla long ka nongwanrah jingkylla kaba jar jar na ka jingdum sha ka jingshai kaba ki nongshong shnong katei ka shnong lem ki shnong ba marjan hi haduh mynta ki dang ïai ïathuh khana shaphang ki kam ba bha bad u synñiang jong ka ha ka pule puthi, ka koit ka khiah, ka jingïarap ïa ki khun swet nalor kiwei pat.
Kane ka briew ka dei kaba la tip kyrteng kum ka Annie Margaret Barr kaba ki Khasi ki khot ka Kong Barr bad la kha ïa ka ha u snem 1899 ha England bad khlad pat ha New Delhi ha u snem 1973. Ka la pyndep ïa ka jingpule MA na Cambridge University bad hadien ba ka la pyndep jinghikai ha ka Unitarian Ministry ka la kylla long ka Myntri ha ka Unitarian Church of Our Father ha Rotherham, United Kingdom.
Ka dei ha ka por ba ka don ha ka jinghikai ba ka la tip shaphang ka India lyngba ka Friend of India Society, ka daw jingïakhih ban ïoh laitluid na ki British nangta shaphang u Babu Hajom Kissor Sing Nongbri (u nongseng ïa ka Balang Khasi Unitarian ha ka por ba ka Meghalaya ka dang hap ha ka Jylla Assam) bad kumjuh shaphang u Mahatma Gandhi bad ka la leit ïakynduh ruh ïa ki.
Ka Kong Barr ka la wan nyngkong sha Khasi Hills ha u snem 1934 bad ha u snem 1940 ka la kylla long ka Lecturer jong ka Subject English ha Lady Keane’s College bad ha u snem 1941 ka la shah khot ha ka Sorkar ban hikai bad long Headmistress ha Government High School ha Jowai.
Ka jingïohi jong ka ba ki jaka sor kim don ïa ki lad ban ai jinghikai ryngkat ka jingpule bad jingtreikam bad bun ki khynnah haba ki la pule ha ki jaka sor kim leit phai shuh sha la ki shnong nongkyndong. Kumta ka la ïakren bad ki bor pynïaid ka Balang bad ha u snem 1949 ka la sdang ïa ka Kharang Rural Centre ban ai jingsumar, ki jinghikai ïa ki briew katei ka thaiñ.
Ha ki snem 1960 ka la sdang ïa ka jaka ri khunswet ha ka jaka sah jong ka bad hikai ïa ki ban pule ban thoh. Hadien kane na ka jinglong tymmen bad jingbym don ha ka met ba koit ba khiah ka la ïakren bad ki bor shnong ban plie ïa ka skul ha u snem 1968 ban pynïaid da kiba ïa don bynta bad kane ka skul ka ïeng mynta ha ka kyrteng ka Annie Margaret Barr Higher Secondary School ha katei ka shnong.
Ka Kong Barr ka la khlad noh ha ka 11 tarik u Nailar, 1973 ha New Delhi ha ka por ba ka leit shah sumar bad la thang ïa ka ha katei ka nongbah bad la wanrah ïa u dpei ha Kharang bad buh ïa u ha u motdur jong ka.
Ha ka 24 tarik u Risaw, 2023, ka Balang Unitarian lem ka School Managing Committee ka Annie Margaret Barr HS School ki pynlong ka jingpynhap pyrda noh ïa jingrakhe kynmaw burom ïa ka jingdap 50 snem ka jingkhlad noh jong ka ha phyllaw katei ka skul.
Ha kane ka sngi la ïa donlang da u Bah Banteidor Lyngdoh, MLA ka Mawkynrew kum u kongsan, u Bah Martle N Mukhim, MDC ka Mawkynrew kum u Symbud Kongsan, u Bah Marki Passah, President Unitarian Union, u Bah Nangroi Suting, , ka Dr Kate R Walker, kaba wan mih khmat na ka First Unitarian Church, Pittsburgh, USA , u Dr Khlur Mukhim, u Bah Banjop Mukhim nalor u Bah Wanpher Muttyent, Chairman lem kiwei pat.
Nalor ki nongïalam ka Balang, la ïadon lang da ki khynnah skul barim kane ka skul kiba la ai ïa ki skit bad jingrwai, ki riewrangbah ki longkmie kiba dang kynmaw bad ithuh ïa ka Kong Barr ha ki 50 snem mynshwa, ki khynnah skul ba mynta, ki nonghikai, ki Kmie ki kpa lem kiwei pat.
Ha kane ka sngi, u Bah Banteidor kum u kongsan u la pyllait paidbah ïa ka thup sah kynmaw lane ka Souvenir jong ka jingdap 50 snem ka jingkhlad noh ka Kong Barr bad haba ai jingkren u la kular ban ai jingïarap ïa ka skul ban shna ïing skul ha ka mang tyngka ba 20 lak na ka SRWP 2023-2024.