Shillong, Jylliew 2: Ka Hynniewtrep Youth Development Council (HYDC) ka la kyntu ïa u Myntri Rangbah ka Jylla u Conrad K Sangma ban thaw ïa ka Meghalaya Employment Policy kaba bniah bad ban pynkhlain shuh shuh ïa ka jingpyntreikam ïa ka MIIP-2024 da kaba kdew ïa ka jingduna ki kam lajong bad ka jingpynkhein ïa ka ain labour.
Da kaba kdew ba ka bynta kaba khraw jong ki lad kamai ka wan na ki bynta jong ki kam shakri, ka HYDC ka la ong ba ka polisi ka dei ban kyntiew “ka kam ha ka thaiñ ha kylleng ki karkhana, ka kam jngohkai pyrthei, ka koit ka khiah, ka pule puthi, ka jingdie marbam, ka leit ka wan, bad kiwei kiwei ki kam shakri.”
Ha ka MIIP-2024, ka Council ka la pynpaw ïa ka jingduna jong ki lad kamai kiba lah ban ïoh da ki samla trai ri ha ki kynhun karkhana bad ka la pan ïa ka “jingpeit bniah katkum ka distrik ïa ka jingbud ryntih ïa ki kyndon ai kam trai” bad ka jingpynmih ïa ki “jingkheiñ jingdiah jong ki karkhana kiba pyni ïa ka jinglong jong ki nongtrei trai ri bad ki bym dei trai ri.”
Ka HYDC ka la pynpaw ïa ka jingsngewkhia halor ka jingsiew, da kaba ong ba “ki nongtrei kiba trei ha ki katto katne ki jaka theh umphniang la ïathuh ba ki ïoh ïa ka jingsiew kaba kumba ?7,000 shibnai, kaba, lada pynshisha, kan long kaba duna bha ïa ka jingsiew kaba rit tam ba la buh.”
Ka la dawa “ban pyntreikam pyrkhing ïa ka (minimum wage laws) ne ka ain ba ai jingsiew kaba rit” bad ka “lad pynbeit ïa ki jingeh jong ki nongtrei.”
Da kaba kdew ïa ki jinglap jong ka RTI halor ki jaka MUDA, ka la ong ba “ki jingbym ïahap ki paw ba ki don hapdeng ki kyrteng jong ki nongïoh jaka tynrai bad ki nongshong ba shisha,” bad ka la pan ïa ka “jingpeit bniah ha ka jylla baroh kawei ïa baroh ki jaka khaii jong ka MUDA.”
“Ka roi ka par ka dei ban thaw kam thaw jam, ki lad kamai, bad jingmyntoi ha ka ioh ka kot na ka bynta ki paidbah ka Meghalaya,” la ong ka HYDC da kaba bynrap ba ki marpoh khyndew jong ka Jylla ha kaba kut ki dei ban pynkylla sha ka kam, ka jingseng kam seng jam, ka jingsiew kaba hok, bad ka jingpynbha ïa ka jingim jong ki samla trai ri.
